传统文化 National Culture

当前位置：首页 > 传统文化 > 彝族传说与口承文学

彝汉文对译｜彝族英雄史诗：支格阿鲁

作者：四川彝族文化研究中心 发布时间：2022-11-13 原出处：四川彝族文化研究中心官网赞+（）

2001年，正是互联网兴起的年代，彝-人-网团队便确立了构建彝族文化数据库的宏远目标，初心不改，坚持走下去。

一、ꋍꍜꇰꀉꇐꒆ，支格阿鲁诞生

ꀃꌋꂾꀊꆨ，远古的时候，

ꃅꃴꃄꅉꃝ，天地相结缘，

ꌠꐎꃅꐎꃝ，白云白土相结缘，

ꌠꆈꃅꆈꃝ，黑云黑土相结缘，

ꃅꆈꌿꉘꃝ，黑土杉林相结缘，

ꌿꉘꃪꀑꃝ，杉林山崖相结缘，

ꃪꀑꆂꒉꃝ，山崖江河相结缘，

ꆂꒉꉜꏂꃝ，江河鱼儿相结缘，

ꎋꉘꎋꅪꃝ，翠竹索玛相结缘，

ꏂꇖꏁꏪꃝ，山峦垭口相结缘，

ꁦꒉꇈꉬꃝ，高山深谷相结缘。

ꇈꉬꏁꌋꒃ，深谷生女叫施色，

ꈭꏂꃅꃴꁳ。嫁到谷史木吾去。

ꃅꃴꀕꀋꃋ，蓝天生下女，

ꄂꃴꀕꅍꐛ，嫁给蓝云家。

ꄂꃴꀕꀋꃋ，蓝云生下女，

ꄂꆈꆧꅍꐛ。嫁给黑云家。

ꄂꆈꆧꀋꃋ，黑云生下女，

ꄂꏂꀕꅍꐛ。嫁给黄云家。

ꄂꏂꀕꀋꃋ，黄云生下女，

ꄂꐎꀕꅍꐛ。嫁给白云家。

ꄂꐎꀕꀋꃋ，白云生下女，

ꉒꈌꐎꃴꐛ。嫁给灰雾家。

ꐎꃴꇐꌺꒆ，雾霭生龙子，

ꆂꒉꇐꌺꄃ，居住在江中，

ꉜꏂꇐꎔꀠ，金鱼来作陪，

ꉜꁯꇐꈩꐋ，大鱼来做伴，

ꉜꌺꇏꑣꄮ。小鱼供龙食。

ꆂꒉꇐꌺꒆ，江中生龙子，

ꃪꅪꇐꌺꄃ，居住在岩上，

ꇓꃀꇓꎔꀠ，巨石来作陪，

ꇓꌺꇐꈩꐋ，小石供龙玩，

ꐛꑿꇏꑣꄮ。小蜂供龙食。

ꃪꅪꇐꌺꒆ，岩上生龙子，

ꌿꉘꇐꌺꄃ，居住在杉林，

ꊴꌺꇐꎔꀠ，鹿子来作陪，

ꐔꌺꇐꈩꐋ，麂子来做伴，

ꇍꌺꇐꑣꄮ。獐子供龙食。

ꌿꉘꇐꌺꒆ，杉林生龙子，

ꈭꍪꍫꉘꐛ，居住在谷冲冲洪，

ꈭꍪꍫꉘꆏ，谷冲冲洪这地方，

ꈭꃀꀉꎓꒆ，谷氏生女叫阿芝，

ꈭꏂꃅꃴꐛ。嫁到谷史木吾去。

ꃅꃴꃅꇴꒆ，木吾生女叫木古，

ꀐꑌꄀꅍꐛ。嫁到俄伲氐家去。

ꄀꑌꇐꏪꒆ，氐家生女叫尔觉，

ꒈꀑꆺꆹꐛ。嫁到北方列勒家。

ꆺꆹꂷꏾꒆ，列勒生女叫玛箐，

ꐱꑴꎰꆈꐛ。嫁到井宜硕诺山。

ꎰꆈꀉꐩꒆ，硕诺生女叫阿举，

ꃱꅔꆫꐎꐛ。嫁到俄地尔曲山。

ꆫꐎꅪꎔꒆ，尔曲生有一美女，

ꄂꏂꎰꆈꐛ。嫁到底史硕诺山。

ꄂꏂꂷꏦꒆ，底史生女叫马结，

ꀑꇈꋓꃱꐛ。嫁到俄洛则俄山。

ꋓꃱꅫꃀꒆ，则俄生女叫尼莫，

ꎭꂵꀕꉘꐛ。嫁到沙马马洪山。

ꇍꀮꐎꂿꒆ，马洪生女叫曲莫，

ꃄꌅꇌꉘꐛ。嫁到木兹勒俄山。

ꆿꅪꀉꏦꒆ，勒俄生女叫阿间，

ꀀꃌꋒꂿꐛ。嫁到衣木则摩山。

ꇍꀮꊈꆈꒆ，则摩生女叫俄洛，

ꀒꎂꅚꍃꐛ。嫁到俄卓达日山。

ꅚꍃꃀꏁꌋ，达日生女叫史色，

ꊨꀕꀋꃋꅍ。嫁到孜资阿木家。

ꊨꀕꀋꃋꒆ，孜资生女儿，

ꊨꃋꇜꅍꐛ。资女嫁耿家。

ꇜꀕꀋꃋꒆ，耿家生女儿，

ꇜꀕꁍꅍꐛ。耿女嫁蒲家。

ꁍꃀꅩꌕꒆ：蒲家生三女：

ꁍꃀꏸꂷꏸꅍꐛ，蒲莫基玛嫁基家，

ꁍꃀꅙꇪꅙꅍꐛ，蒲莫达果嫁达家，

ꁍꃀꅩꒌꋒ。蒲莫妮依未出嫁。

ꁍꃀꅩꒌꑌ，蒲莫妮依啊，

ꑱꐎꋍꉻꌊ，带着纺织料，

ꆹꇈꈵꃴꑌ，来到屋檐下，

ꑱꉻꏂꂿꄷ，创造纺织术，

ꌕꑍꌕꉖꏂ，造了三天又三夜，

ꑱꏂꑱꐛꀕ？织术造成否？

ꑱꏂꑱꂸꐛ。织术未造出。

ꊁꇁꋍꑍꏂ，尔后有一天，

ꍆꀕꐟꆽꑌ，坐在扎扎阶勒山，

ꏃꑍꏃꉔꏂ，造了七天又七夜，

ꑱꏂꑱꐛꀕ？织术形成否？

ꑱꏂꑱꂸꐛ。织术未形成。

ꉈꑴꋍꑍꆏ，尔后又一天，

ꆹꇈꆹꇈꃅ，走着又走着，

ꄵꇓꁦꀑꑌ，走到土尔山，

ꄵꇓꁦꀑꆏ，土尔山上呢，

ꉗꁌꅔꆺꆹ，山地宽又广，

ꁧꏡꎵꑳꀕ，山脉长又长，

ꁦꀑꏻꂳꀕ，山顶尖又尖，

ꉒꏂꁦꈌꏣ，黄云绕着山，

ꅐꌦꀋꅐꌦ，似现又非显，

ꉒꐎꂱꇊꀕ，白云俱寂卧，

ꎭꋰꋍꄿꌡ，犹如一团白羊毛。

ꁍꃀꅩꒌꑌ，蒲莫妮依啊，

ꈬꑍꈬꉖꏂ，造了九天又九夜，

ꑱꏂꑱꐛꀕ？织术创成否？

ꑱꏂꑱꐛꃲ。织术创成了。

ꁍꃀꅩꒌꑌ，蒲莫妮依啊，

ꌕꈎꑱꉻꏂ，三年设织布，

ꌕꆪꑱꐞꄖ，三月立织架，

ꑱꍹꁦꀑꑌ。纺织于山上。

ꅶꁉꑱꇺꄩ，对面定织桩，

ꑱꇺꃅꏸꋦ，织桩如星阵，

ꃅꏸꄄꍅꀕ；星星密麻麻；

ꍤꁆꑱꉻꏂ，这面设织架，

ꑱꉻꄁꃨꀕ，织架一层层，

ꑱꉻꏂꅈꅊ。织架金灿灿。

ꑱꃀꏨꅐꆗ，织板翻飞如鹰翅，

ꏨꅐꆗꁍꀕ；鹰翅自如飞；

ꑱꀱꐛꑿꈴ，梭子穿梭如蜜蜂，

ꐛꑿꈳꑰꀕ，轻快又有序，

ꑾꌙꋽꈭꀕ；轻巧又灵活；

ꌋꀕꉧꑳꀕ，织线如彩虹，

ꑱꌩꅥꀕꐂ，织杆弹跳着，

ꅥꀕꐂꃰꀕ。弹跳飞跃忙。

ꁍꃀꅩꒌꑌ，蒲莫妮依啊，

ꑱꍹꑌꑱꐛ，纺织成布料，

ꑱꐛꇣꀱꀕ，成布很牢实。

ꑱꍹꑌꑱꎔ，纺织布料美，

ꑱꎔꇣꍠꀕ。布美很鲜艳。

ꁍꃀꅩꒌꑌ，蒲莫妮依啊，

ꇬꇉꒇꇴꀕ，满腔乐融融，

ꉌꂵꇿꇴꀕ，心里美滋滋。

ꑱꍹꐚꄜꆹ，纺织技术哟，

ꁍꃀꅩꒌꁧ。蒲莫妮依创。

ꁍꃀꅩꒌꑌ，蒲莫妮依啊，

ꉌꌤꑓꀖꆏ，孤独寂寞时，

ꏮꇁꃅꃴꉜ，举头望远空，

ꆳꌾꆲꂰꀕ，风起又云涌，

ꃅꐛꃴꇉꀕ。远空湛蓝蓝。

ꉌꂅꑓꑣꆹ，闷闷不乐时，

ꏮꇊꃅꈬꉜ，转向看近空，

ꃅꇔꄂꅪꈫ。空中有红云。

ꉌꇙꑒꇙꆹ，情意躁动时，

ꏮꇁꃅꈋꉜ，抬头望四周，

ꃅꈋꎵꑳꀕ。四周宽又阔。

ꁍꃀꅩꒌꑌ，蒲莫妮依哟，

ꉌꐡꑓꇗꑌ。心情不平静。

ꀉꐔꊰꏁꈓ，少女十七岁，

ꀀꁍꄚꂸꁍ，家业非娘家，

ꀀꑘꄚꂸꑘ。劳作非故土。

ꁍꃀꅩꒌꑌ，蒲莫妮依哟，

ꉪꇈꀋꐚꇖ，心事也重重，

ꉌꃀꐂꀕꁏ，感情也波动，

ꐂꀕꁎꆽꀕ。烦躁又不安。

ꏮꇁꁦꀑꉜ，抬眼望山上，

ꑱꅪꌋꀕꏡ，山垭翻红云，

ꉘꇢꏽꀕꁏ，白桦叶儿瑟瑟抖，

ꅩꒌꉌꃀꑌ，妮依心儿呀，

ꄚꈿꐂꀕꁏ。跟着瑟瑟抖。

ꏮꇁꇉꅶꉜ，抬眼看山谷，

ꇉꅶꂶꏾꁏ，山谷竹叶飘，

ꅩꒌꉌꃀꑌ，妮依心儿呀，

ꄚꈿꐂꀕꁏ。也在跟着飘。

ꃅꇗꀃꑍꆏ，就在这一天，

ꄵꇓꁦꀑꏭ，土尔山头上，

ꃅꃴꄀꋍꋒ，南方一对鹰，

ꄀꉘꇉꊂꇁ，来自底洪谷，

ꅏꀑꑙꄉꇁ。翅膀敛着飞。

ꃅꈋꄀꋍꋒ，北方一对鹰，

ꍞꉬꁧꊂꇁ，来自直恩山，

ꅏꀑꆗꄉꇁ。翅膀扇着飞。

ꌕꁕꄀꋍꋒ，四方一对鹰，

ꅙꑭꁧꊂꇁ，来自蕨芨山，

ꅏꀑꉧꄉꇁ。翅膀弯着飞。

ꉬꐮꄀꋍꋒ，下界一对鹰，

ꑛꇐꃢꊂꇁ，来自尼尔维，

ꅏꀑꈎꄉꇁ，翅膀斜着飞。

ꄀꇐꇖꂷꆹ，四只神龙鹰，

ꎺꋦꁧꑎꇁ，来自杉林山，

ꅏꀑꃏꄉꇁ。翅膀展着飞。

ꄀꁏꄀꈧꆹ，雄鹰翻又飞，

ꃅꃴꀕꊂꈩ，盘旋在天空，

ꄀꒌꄀꆠꆹ，鹰影鹰魂呀，

ꄵꇓꁦꀑꐛ，罩着土尔山，

ꂸꌸꇏꆹꌸ，恰恰笼罩在，

ꅩꒌꑱꊂꌸ。妮依纺织处。

ꁍꃀꅩꒌꑌ，蒲莫妮依哟，

ꇇꇤꌐꒉꏽ，举手遮阳光，

ꄀꆫꆹꂿꄷ，要去望雄鹰，

ꄀꆈꆹꂿꄷ，要去窥雄鹰，

ꄀꉜꆹꂿꄷ，要去探雄鹰，

ꄀꉘꆹꂿꄷ，要去驱雄鹰，

ꄀꈩꆹꂿꄷ，要去玩雄鹰。

ꄀꑌꄀꃅꈩ，鹰也自顾玩，

ꃬꁍꀕꃅꈩ，盘旋又翻飞，

ꒌꑌꒌꃅꆫ，妮依自顾看，

ꑓꋦꀕꃅꆫ，眼睛直盯着。

ꅏꀑꑙꄉꈩ，翅膀敛着玩，

ꆏꏹꉢꂾꅞ，你追我来赶，

ꒌꑌꒌꃅꉜ，妮依盯着看，

ꒈꆭꀕꃅꉜ。微微笑着看。

ꅏꀑꆗꄉꈩ，翅膀摇着玩，

ꆏꄿꉠꄩꃰ，上下竞翻飞，

ꒌꑌꒌꃅꆈ，妮依自顾看，

ꑓꍝꀕꃅꆈ。睁大眼睛看。

ꅏꀑꉧꄉꈩ，翅膀弯着玩，

ꆏꁏꉢꐙꃅ，相互叠着玩，

ꒌꑌꒌꃅꎎ，妮依斜着看，

ꎲꄏꉻꃅꎎ。羞答答地看。

ꅏꀑꈎꄉꈩ，翅膀敛着玩，

ꆏꑄꉢꌶꃅ，相互拍打玩，

ꒌꑌꒌꃅꅲ，妮依静听着，

ꅺꌝꀕꃅꅲ。瑟瑟抖着听。

ꃅꈬꏨꆉꑌ，空中雄鹰啊，

ꁏꅉꈩꅉꃅ，反复嬉戏着，

ꃅꐛꃄꄵꀕ，天地之怪事，

ꃄꉈꀳꇖꀕ，一触就即发，

ꀋꇮꆺꌋꀕ，离奇也难怪。

ꇮꇁꌕꌋꀕ，恰巧这时候，

ꄀꌦꌕꄧꊰ，鹰射三滴血，

ꊰꇁꅩꒌꌸ。落在妮依身。

ꂸꌸꇐꆹꌸ，落得真奇怪，

ꋍꄧꀑꊂꌸ，一滴落头帕，

ꀍꏶꈬꄅꈴ，穿透九层辫，

ꀑꃀꑓꉱꏂ；头昏又目眩；

ꋍꄧꐧꊂꌸ，一滴落腰部，

ꏂꏾꈬꄅꈴ，穿透九层毡，

ꇖꌋꉄꈠꀕ；四肢酸又软；

ꋍꄧꂪꊂꌸ，一滴落下身，

ꂃꂪꈬꄅꈴ，穿透九层裙，

ꎭꈠꍅꋍꀕ，全身在颤抖；

ꋌꇷꏾꌋꀕ，直吓得发抖，

ꋌꇰꇖꁨꄜ，直振得发呆，

ꋌꎹꀰꍠꀕ。直吓得发蒙。

ꁍꃀꅩꒌꑌ，蒲莫妮依啊，

ꀋꎺꀋꈨꀱ，魂魄失落回，

ꀋꌋꀋꏢꀱ。神志恍惚回。

ꀱꇁꑲꁧꑟ，返回屋檐下，

ꐷꈭꏂꊂꈴ，来到家门口，

ꈌꐎꌺꋒꑌ，一对白狗哟，

ꋌꇁꅩꒌꋩ，前来迎妮依，

ꁍꎼꆣꈩꀕ，尾巴摇得欢，

ꁍꃀꅩꒌꑌ，蒲莫妮依啊，

ꈌꀑꌎꂸꉂ，无心抚慰狗，

ꉼꄷꑌꂾꑌ，瘫软坐堂屋，

ꅞꄷꉱꈓꀀ。躺在内屋睡。

ꁍꃀꅩꒌꑌ，蒲莫妮依啊，

ꏃꑍꊯꌕꐛ，过了十三天，

ꂵꇖꀕꃅꐙ，有异样之感，

ꎼꇁꃏꉬꉂ。以为是凶兆。

ꀘꅲꆹꂿꄷ，要去问毕摩。

ꆹꇈꆹꇈꃅ，走着又走着，

ꇽꀑꌕꏮꀕ，寨首转三遍，

ꇽꀑꀘꀀꀕ？寨首有毕摩？

ꇽꀑꀘꂸꀀ，寨首无毕摩。

ꁍꃀꅩꒌꑌ，蒲莫妮依哟，

ꑟꄚꀱꂸꄚ，心灰又意冷，

ꀋꐚꇖꃅꀱ。叹息而返回。

ꋌꊂꈭꐨꆏ，自从那以后，

ꁍꃀꅩꒌꑌ，蒲莫妮依啊，

ꏃꑍꊯꌕꐛ，又过十三天，

ꀑꉭꀕꃅꐛ，有点头昏感，

ꂸꇮꂸꑴꉂ。以为是凶兆。

ꁍꃀꅩꒌꑌ，蒲莫妮依哟，

ꀘꅲꆹꂿꄷ，要去问毕摩。

ꆹꇈꆹꇈꃅ，走着又走着，

ꇽꂪꌕꏮꀕ，寨尾转三遍，

ꇽꂪꀘꀀꀕ？寨尾有毕摩？

ꇽꂪꀘꂸꀀ，寨尾无毕摩。

ꆹꄚꀱꂸꄚ，心灰又意冷，

ꐝꀱꀕꃅꀱ。伤感地返回。

ꋌꊂꇁꈭꐨ，从那以后哟，

ꁍꃀꅩꒌꑌ，蒲莫妮依啊，

ꏃꑍꊯꌕꐛ，又过十三天，

ꃀꀕꋧꀕꆅ，小病不断发，

ꌧꉬꎫꉬꉂ。以为是死兆。

ꁍꃀꅩꒌꑌ，蒲莫妮依啊，

ꀘꅲꆹꂿꄷ，要去问毕摩。

ꆹꇈꆹꇈꃅ，走着又走着，

ꇽꅶꌕꏮꀕ，前村转三回，

ꇽꅶꀘꀀꀕ？前村有毕摩吗？

ꇽꅶꀘꂸꀀ，前村无毕摩。

ꑟꄚꀱꂸꄚ，心灰又意冷，

ꏷꁠꀕꃅꀱ。悻悻而返回。

ꋌꊂꈭꐨꆏ，从那以后哟，

ꁍꃀꅩꒌꑌ，蒲莫妮依啊，

ꏃꑍꊯꌕꐛ，又过十三天，

ꒉꁠꀕꃅꆅ，恍恍惚惚病，

ꋍꇁꄸꉬꉂ。以为是坏事。

ꁍꃀꅩꒌꑌ，蒲莫妮依哟，

ꀘꅲꆹꂿꄷ，要去问毕摩。

ꆹꇈꆹꇈꃅ，走着又走着，

ꇽꍤꌕꏮꀕ，后村转三圈，

ꇽꍤꀘꀀꀕ？后村有毕摩吗？

ꇽꍤꀘꂸꀀ，后村无毕摩。

ꆹꄚꀱꂸꄚ，心灰又意冷，

ꐒꎭꀱꃅꀱ。伤心地返回。

ꋌꊂꈭꐨꆏ，从那以后哟，

ꁍꃀꅩꒌꑌ，蒲莫妮依啊，

ꎸꀕꈠꀕꆅ，畏寒又发热，

ꀊꇷꇈꀊꇷ，可怜真可怜，

ꀀꏖꉬꀐꉂ。心想要丢命。

ꀘꅲꆹꂿꄷ，要去问毕摩，

ꀘꇫꆹꂿꄷ。要去询毕摩。

ꃅꇗꋋꄮꆏ，到了这时候，

ꀘꅲꀘꇫꆹ，要去问毕摩，

ꊌꆏꀱꂿꄷ，找到毕摩才能返，

ꂸꊌꂸꀱꄷ。不见毕摩不返回。

ꏃꃅꄜꇁꃲ，天要发亮了，

ꃪꀮꇴꇁꃲ，公鸡鸣叫了，

ꄜꐛꐎꇁꃲ。天边微微亮。

ꇣꁁꌕꁏꏭ，堂屋内上方，

ꇣꁁꅪꀀꀕ？有无姑娘住？

ꅪꀀꅪꄓꇁ，有则快起来，

ꅪꄓꄔꏦꇁ，起来烧起火，

ꄔꏦꑓꂿꇁ，燃火来照明，

ꑓꂿꈾꃴꇁ，照明磨荞子。

ꈾꃴꃆꇭꄝ，磨盘旋转如马奔，

ꈾꏢꆲꏂꃬ，筛荞如旋风，

ꈾꍀꇇꆹꏂ，揉荞手染黄，

ꇇꆹꏂꅎꀕ，手掌黄灿灿，

ꈾꃚꇓꁨꐛ，荞粑堆如山，

ꇓꁨꎅꇌꀕ，如石垒成排，

ꈴꏬꆈꀪꀕ，荞粑黄澄澄，

ꐰꇑꏁꀪꀕ，魂魄也将黄灿灿。

ꇤꉎꌕꁄꏭ，火塘的上方，

ꇤꉎꆗꀀꀕ？有无小伙住？

ꇤꉎꆗꀀꆏ，火塘有小伙，

ꆗꀀꆗꄓꇁ，有则快起来，

ꆗꄓꍪꋠꇁ，起来吃早餐。

ꍪꋠꂊꊫꀕ，早餐吃饱肚，

ꌟꃅꆗꌺꑌ，能干的小伙，

ꈌꐎꏣꐎꄀ，白狗栓白绳，

ꈌꆈꏣꆈꄀ，黑狗栓黑绳，

ꃅꆈꏷꏸꒃ，牵来黑马名几几。

ꇣꁁꌕꁏꏭ，火塘的下方，

ꏂꇁꎭꆈꀖ，取出黑皮毡，

ꏂꇁꎭꆈꌊ，拿着黑皮毡，

ꃅꆈꏷꏸꆌ，来垫黑马几几鞍。

ꋌꆌꋋꋽꀕ？垫着好看吗？

ꋌꆌꋋꂸꋽ。垫着不好看。

ꏸꑴꊀꆈꀖ，取出漆绘黑马鞍，

ꏸꑴꊀꆈꌊ，拿着漆绘黑马鞍，

ꃅꆈꏷꏸꄀ，来配黑骏马几几。

ꋌꄀꋌꋽꀕ？配它是否美？

ꋌꄀꋋꂸꋽ。配它不美观。

ꁍꃀꅩꒌꑌ，蒲莫妮依哟，

ꆹꇈꆹꇈꃅ，走着又走着，

ꉱꈐꈜꐯꑟ，走到堂屋的下方，

ꊞꅪꊂꂄꀖ，取出红色毛绒垫，

ꊞꅪꊈꂄꌊ，拿着红色毛绒垫，

ꃅꆈꏷꏸꆌ，来垫黑马几几背。

ꋌꆌꋌꋽꀕ？垫着好看么？

ꋌꆌꋋꋽꃲ。垫着好看了。

ꁍꃀꅩꒌꑌ，蒲莫妮依哟，

ꉱꈐꈜꉐꑟ，来到堂屋的上方，

ꄹꊈꊀꁱꀖ，取出彩鞍来，

ꄹꊈꊀꁱꌊ，拿着彩鞍来，

ꃅꆈꏷꏸꄀ，来配黑马几几背。

ꋌꄀꋌꋽꀕ？配着美丽么？

ꋌꄀꋌꋽꃲ。配着真美丽。

ꉱꁧꑭꊂꑟ，来到门背后，

ꎹꉼꄂꅪꌵ，取出马笼头，

ꎹꉼꄂꅪꌊ，拿着马笼头，

ꃅꆈꏷꏸꄀ，套上黑马几几头。

ꋌꅑꋌꋽꀕ？套着美丽吗？

ꋌꅑꋌꋽꃲ。套着很美丽。

ꈄꁨꏂꊂꑟ，来到衣柜前，

ꊞꆈꑱꀘꀖ，取出黑色短上衣，

ꊞꆈꑱꀘꑌ，黑色上衣哟，

ꌠꈚꌠꂸꋽ，你穿也不美，

ꀂꈚꀂꂸꋽ，我穿也不美，

ꅩꒌꈚꆏꋽ，妮依穿就美，

ꋽꇕꋽꇵꀕ，美丽又典雅，

ꉦꇕꉦꑣꀕ。合身又华丽。

ꏂꃴꏂꆈꀖ，取出花色裙，

ꏂꃴꏂꆈꑌ，美丽的花裙，

ꌠꈚꌠꂸꋽ，你穿也不美，

ꀂꈚꀂꂸꋽ，我穿也不美，

ꅩꒌꈚꆏꋽ，妮依穿才美，

ꋽꇕꋽꇵꀕ，美丽又典雅，

ꉦꇕꉦꑣꀕ。华丽又合身。

ꏂꃴꏂꆈꀖ，取出蓝黑色披毡，

ꏂꃴꏂꆈꑌ，蓝黑色的披毡哟，

ꌠꈚꌠꂸꋽ，你披也不美，

ꀂꈚꀂꂸꋽ，我披也不美，

ꅩꒌꈚꆏꋽ，妮依披才美，

ꋽꇕꋽꇵꀕ，美丽又典雅，

ꉦꇕꉦꑣꀕ。合身而华丽。

ꏨꑓꀎꇓꀖ，取出鹰眼帽，

ꏨꑓꀎꇓꑌ，鹰眼帽子哟，

ꌠꅑꌠꂸꋽ，你戴也不美，

ꀂꅑꀂꂸꋽ，我戴也不美，

ꅩꒌꅑꆏꋽ，妮依戴才美，

ꋽꇕꋽꇵꀕ，美丽又高雅，

ꉦꇕꉦꑣꀕ。合身而华丽。

ꁍꃀꅩꒌꑌ，蒲莫妮依啊，

ꃅꆈꏷꏸꋩ，骑着黑骏马几几。

ꆹꇈꆹꇈꃅ，走着又走着，

ꇁꄿꌕꏢꐂ，涉过三条沟，

ꒊꊨꌕꂷꋒ，遇到三个急旋涡。

ꃅꆈꏷꏸꑌ，黑马几几呀，

ꒉꌌꀋꇊꁧ，险些被水冲，

ꃅꆈꀱꂿꄷ，黑马要返回，

ꅩꒌꀱꂸꅲ。妮依不肯回。

ꁍꃀꅩꒌꑌ，蒲莫妮依啊，

ꂃꑭꍣꄉꈭ，挽着裙过河，

ꂃꑭꀮꇗꀕ，裙角沉甸甸，

ꂃꂪꈬꄅꑌ，九层裙角呀，

ꒉꌌꄚꇽꇈ，被水冲破了，

ꊂꉅꊂꌊꇈ。冲破也抱走。

ꏦꏪꌕꂷꈴ，走过三个坡，

ꇓꂃꌕꂷꋒ，遇上三滚石。

ꃅꆈꏷꏸꑌ，黑马几几呀，

ꇓꅥꀋꇊꌦ，险些被击死，

ꃅꆈꀱꂿꄷ，黑马欲要返，

ꅩꒌꀱꂸꅲ。妮依不肯回。

ꁍꃀꅩꒌꑌ，蒲莫妮依啊，

ꏂꇔꇇꆹꈯ，脱毡搭手腕，

ꇇꆹꀨꈩꀕ，手腕沉甸甸，

ꏂꏾꈬꁱꑌ，九层披毡呀，

ꇓꂃꄚꇽꇈ，被滚石击破，

ꊂꉅꊂꌊꇈ。击破也抱走。

ꆽꏦꌕꏢꈴ，翻过三垭口，

ꆲꏂꌕꄲꋒ，遇上三旋风。

ꃅꆈꏷꏸꑌ，黑马几几呀，

ꆳꌌꀋꇊꁧ，险些被吹走，

ꃅꆈꀱꂿꄷ，黑马欲要返，

ꅩꒌꀱꂸꅲ，妮依不肯回。

ꁍꃀꅩꒌꑌ，蒲莫妮依啊，

ꏢꁮꋒꄉꆹ，侧着身子走，

ꏨꑓꀎꇓꑌ，鹰眼帽子呀，

ꆳꌊꄚꇽꇈ，被风吹破了，

ꊂꉅꊂꌊꇈ。吹破也抱走。

ꀘꉎꈜꐞꑟ，来到毕摩村路口，

ꀘꉎꈜꐞꆏ，就在毕摩村路口，

ꂸꋒꇏꆹꋒ，偶遇真奇巧，

ꀉꑳꃮꆫꋒ，遇上放猪娃。

ꅩꒌꆹꄚꅲ，妮依上前问？

ꆍꏤꀘꀀꀕ？你村有无毕摩？

ꀉꑳꃮꆫꑌ，放猪小孩答，

ꉪꏤꃅꄷꏭ，我们的家乡，

ꀘꋦꅡꆺꀕ，毕家房屋宽又大，

ꀘꀀꉘꁇꁉ。毕家事业兴又旺。

ꑳꉎꌕꁏꏭ，他家屋上方，

ꑌꇁꑿꈜꆹ，有条牛羊路，

ꐍꊏꀕꑷꌠ。牛羊路宽敞那家。

ꑳꐮꌕꁏꏭ，他家屋下方，

ꆿꇁꍯꈜꆹ，有条农耕路。

ꁤꐥꀕꑶꌠ。耕路亮堂堂那家。

ꑳꉎꑌꈤꆹ，上方放牛时，

ꄮꑭꆈꑶꌠ。布满松树林那家。

ꑳꅶꋧꈤꆹ，对面放山羊，

ꃪꏦꐎꑶꌠ。岩上白晃晃那家。

ꑳꐮꃮꈤꆹ，下方放猪时，

ꊫꉻꆈꑶꌠ。沼泽黑压压那家。

ꑱꈐꑷꈤꆹ，屋内放鸡时，

ꐷꈭꏂꑶꌠ。院坝黄灿灿那家。

ꑳꎏꇖꎏꌠ，他家屋四角，

ꐰꃅꐰꌺꆹ，坐着四只鹦鹉鸟。

ꇖꂷꑌꑶꌠ。就是那一家。

ꑳꑊꇖꑊꌠ，他家屋四壁，

ꇇꌒꇖꂷꆹ，印有四个章，

ꄚꇬꎑꑶꌠ。就是那一家。

ꑳꉼꇖꉼꌠ，他家屋四周，

ꄹꀧꉆꂷꑌ，拴着八只狗，

ꇬꁋꄉꑶꌠ。就是那一家。

ꉼꑴꉼꏯꆹ，院墙围四周，

ꑷꂿꉼꏑꀕ，房屋宽敞又明亮。

ꑳꅐꇖꁆꌠ，四方屋檐上，

ꑙꆉꇖꂷꆹ，四只猩猩哟，

ꄚꇬꇴꑶꌠ。在那里叫着。

ꇽꐧꌕꏮꀕ，村中转三圈，

ꇽꐧꀘꀀꀕ？村中有毕摩？

ꇽꐧꀘꀀꇈ。村中有毕摩。

ꁍꃀꅩꒌꑌ，蒲莫妮依啊，

ꅺꁧꑾꌙꀕ，听后心安定，

ꃅꇔꎭꇬꆙ，放马于田间，

ꊀꇔꄹꄩꅞ，放鞍于坎上，

ꄹꄩꆈꁧꀕ，坎上黑压压，

ꍋꇔꉺꀑꄀ，马套挂屋里，

ꉺꀑꅡꊪꊫ，房屋显稳固，

ꆹꇈꀘꐮꑟ，来到毕摩家，

ꅩꒌꄚꄉꄜ，妮依把话讲，

ꀘꃀꑳꂸꐥ，毕摩不在家，

ꀗꌺꑳꐥꇈ。毕徒在家里。

ꀗꌺꇢꀕꑌ，毕徒嘎嘎啊，

ꀏꊃꁻꇤꈈ，底层垫竹席，

ꐧꊃꊉꂄꈈ，中层铺厚毡，

ꄩꊃꋖꆭꈈ，上面铺薄毡，

ꋍꄩꍀꑆꈈ，再垫豹子皮，

ꄩꏮꆿꑆꈈ，上层垫虎皮，

ꐓꇁꇌꑐꈈ，又垫麂獐毛。

ꆿꑆꏢꁮꉈ，狼皮围身边。

ꃺꇇꄯꒉꌊ，左手拿经书，

ꁰꀕꋓꒃꌊ，经卷握手中，

ꑴꇇꏿꈌꌊ，右手执神扇，

ꏿꈌꄏꒃꌊ，神扇摇晃着，

ꆫꂮꄏꒃꅑ，头上戴斗笠，

ꀗꊈꑌꅉꇊ。正在做法事。

ꁍꃀꅩꒌꑌ，蒲莫妮依啊，

ꆹꇈꀘꐮꑌ，坐在毕徒前，

ꂃꂪꀨꄂꃅ，裙角当坐垫，

ꂃꇇꂱꀯꉱ，衣袖掩嘴角，

ꉨꊝꀕꃅꑌ，坐姿露怯意，

ꎲꄏꉻꃅꑌ，羞怯怯地坐，

ꇬꇉꄸꏾꆗ，心绪如飘叶，

ꈁꑓꁨꆺꀕ。脸儿红彤彤。

ꁍꃀꅩꒌꑌ，蒲莫妮依啊，

ꁱꐭꀘꏭꅲ，开口问毕徒。

ꀗꌺꇢꀕꑌ，毕徒嘎嘎啊，

ꈁꈴꌋꂸꄐ，并没乱搭理，

ꄓꆹꄓꆹꃅ，跟着站起来，

ꑌꂾꌕꁏꈴ，绕过锅庄石，

ꉱꈐꈜꐯꑟ，来到里屋间，

ꏸꁨꏂꊂꅞ，站在漆柜前，

ꃽꇇꏸꈌꁉ，左手开柜门，

ꑴꇇꏸꉱꉩ，右手摸柜底，

ꄯꒉꏂꇙꀖ。取出黄经书。

ꀗꌺꇢꀕꑌ，毕徒嘎嘎啊，

ꀱꇁꑋꅉꑌ，返回坐其位。

ꃽꇇꄯꒉꌊ，左手执经书，

ꑴꇇꏿꈌꌊ，右手拿神扇，

ꂴꆽꋍꃢꁏ，先来翻一遍。

ꋍꋒꑍꏾꁏ，一次翻两页，

ꋍꏾꇇꈐꄉ，一页在手心，

ꋍꏾꇇꉈꄉ，一页搭手腕。

ꄯꒉꅇꅑꀕ？经书有言吗？

ꄯꒉꅇꂸꅑ，经书无言语。

ꂷꋶꅇꌬꀕ？文字有记吗？

ꂷꋶꅇꂸꌬ，文字没记载。

ꀗꌺꇢꀕꑌ，毕徒嘎嘎啊，

ꑊꑍꐓꉩꀕ。惶惑又不安。

ꁍꃀꅩꒌꑌ，蒲莫妮依啊，

ꉌꂵꂅꑣꀕ。心头乱纷纷。

ꊂꇁꋍꃢꁏ，再来翻一遍，

ꑍꋒꇖꏾꁏ，这次翻四页，

ꑍꏾꇇꈐꄉ，二页在手心，

ꑍꏾꇇꉈꄉ，二页搭手腕。

ꄯꒉꅇꅑꀕ？经书有言吗？

ꄯꒉꅇꂸꅑ。经书无言语。

ꂷꋶꅇꌬꀕ？文字有记吗？

ꂷꋶꅇꂸꌬ。文字没记载。

ꀗꌺꇢꀕꑌ，毕徒嘎嘎啊，

ꑊꑍꌧꂸꁉ，脸色阴沉沉。

ꁍꃀꅩꒌꑌ，蒲莫妮依啊，

ꇬꇉꉗꅍꀕ。内心空荡荡。

ꉈꑴꋍꃢꁏ，再来翻一遍，

ꌕꋒꃘꏾꁏ，这次翻六页，

ꌕꏾꇇꈐꄉ，三页在手心，

ꌕꏾꇇꉈꄉ，三页搭手腕。

ꄯꒉꅇꅑꀕ？经书有言吗？

ꄯꒉꅇꅑꇁ，经书无言语。

ꂷꋶꅇꌬꀕ？文字有记吗？

ꂷꋶꅇꌬꇁ，文字有记载，

ꎼꇁꃏꉬꄜ。说有邪气生。

ꀗꌺꇢꀕꑌ，毕徒嘎嘎啊，

ꀒꆹꍠꀕꇤ，直把头来摇。

ꁍꃀꅩꒌꑌ，蒲莫妮依啊，

ꋌꇷꏾꌌꀕ。吓得直哆嗦。

ꀱꇁꋍꃢꁏ，再来翻一遍，

ꇖꋒꉆꏾꁏ，这次翻八页，

ꇖꏾꇇꈐꄉ，四页在手心，

ꇖꏾꇇꉈꄉ，四页搭手腕。

ꄯꒉꅇꅑꀕ？经书有言吗？

ꄯꒉꅇꅑꇁ，经书有言语。

ꂷꋶꅇꌬꀕ？文字有记吗？

ꂷꋶꅇꌬꇁ，文字有记载，

ꇱꇁꃏꉬꄜ。说是生育运。

ꀗꌺꇢꀕꑌ，毕徒嘎嘎啊，

ꑊꑍꒉꆭꀕ，脸上露微笑。

ꁍꃀꅩꒌꑌ，蒲莫妮依啊，

ꎲꄏꐜꋒꃅ。表情显羞涩。

ꊂꇁꋍꃢꁏ，再来翻一遍，

ꉬꋒꊰꏾꁏ，这次翻十页，

ꉬꏾꇇꈐꄉ，五页在手心，

ꉬꏾꇇꉈꄉ，五页搭手腕。

ꄯꒉꅇꅑꀕ？经书有言吗？

ꄯꒉꅇꅑꇁ，经书有言语。

ꂷꋶꅇꌬꀕ？文字有记吗？

ꂷꋶꅇꌬꇁ，文字有记载，

ꐧꇁꈲꉬꄜ。说是大喜运。

ꋖꇪꉘꃅꌊ，拿根绿树枝，

ꑷꃀꐎꒃꀠ，母鸡祭神灵，

ꇱꇁꃏꒌꈎ，召唤生育魂。

ꌦꌺꋍꆺꒆ，要生一神童，

ꌊꌺꋍꆺꒆ。要生一仙子。

ꀗꌺꇢꀕꑌ，毕徒嘎嘎啊，

ꋌꇿꈌꏅꀕ。张嘴笑哈哈。

ꁍꃀꅩꒌꑌ，蒲莫妮依啊，

ꇬꇉꇿꇴꇵ，沉浸幸福中，

ꑾꌙꀕꃅꀱ。轻松回家去。

ꋌꊂꇁꈭꐨ，从那时以后，

ꁍꃀꅩꒌꑌ，蒲莫妮依啊，

ꏃꑍꊯꌕꐛ，过了十三天，

ꂸꊪꇏꆹꊪ，一心请毕摩。

ꃪꅐꃪꊂꊪ，请毕摩路途辛苦，

ꊪꅷꀘꇴꆹ。托人请毕摩。

ꀘꃀꀉꁌꑌ，毕摩大师父，

ꀗꌺꇢꀕꏃ，领毕徒嘎嘎，

ꎺꋦꁧꑎꈴ，过了杉树林，

ꎺꃼꄲꒃꀵ，杉叶背身上。

ꀘꃅꋍꋉꑌ，毕摩一群人，

ꈑꋦꁧꑎꈴ，过了漆树林，

ꈑꆨꃬꒃꅑ。漆汁背身上。

ꂷꋦꁧꑎꈴ，过了竹丛林，

ꂷꃼꇇꒃꌊ。砍竹在手中。

ꉷꃅꇅꈪꈴ，经过汉谷地，

ꄯꒉꐎꒃꌊ。白纸握手中。

ꆿꁮꀒꎂꈴ，过拉布俄卓，

ꂷꋶꆈꒃꌊ。墨汁拿在手。

ꇜꈜꌕꊐꈴ，官路走三层，

ꁱꀕꋓꒃꌊ。官文拿在手。

ꃅꐛꁠꈪꈴ，路过养马场，

ꃆꐛꏲꒃꌊ，马铃拿在手。

ꀘꄑꌋꑳꑟ，毕摩来到家，

ꇱꇁꃏꒌꈎ。来招生育魂。

ꀘꃅꋍꋉꑌ，毕摩一群人，

ꋖꇪꉘꃅꋉ，神枝插满屋，

ꐷꈭꃅꇴꋊ，院坝生青烟，

ꆺꑳꇓꊸꌣ，屋里驱邪气。

ꃪꏂꇱꒉꈎ，黄鸡招育魂，

ꃪꏂꃏꒉꈎ，红鸡招喜魂。

ꐎꏂꄮꎆꁳ，金银赠毕摩，

ꀮꆫꄮꎆꍈ，祭食给毕摩，

ꀗꌺꄮꃀꃅ。毕徒来决断。

ꀘꃀꀉꁌꑌ，毕摩阿普啊，

ꆺꑳꏂꃴꑌ，坐在屋里面，

ꌊꀊꍲꋊꅍ，毕摩招育魂，

ꀗꀕꇱꈻꂯ，毕摩招喜魂。

ꀗꀕꃏꈻꂯ，招魂毕起诵，

ꇱꎹꀘꇬꄏ，诵经招育魂，

ꀗꇬꄏꒉꎹ，助毕招大魂，

ꀘꇬꄎꌬꀕ。招魂声嘹亮。

ꀘꀕꀗꄜꆹ，毕摩把话讲，

ꀗꄜꇖꌕꊨ，说话有分寸。

ꀘꉎꃅꌋꊈ，村外山神们，

ꁭꅐꀙꇐꊈ，东方毕神们，

ꁮꐚꏨꆉꊈ，西方鹰神们，

ꐊꌋꀿꃀꊈ，护身长辈们，

ꃺꄲꆪꃱꄓ，金枝斗笠起，

ꀗꌺꆈꁧꀕ。毕徒黑压压。

ꑌꂪꇁꁥꅸ，驱妖魔鬼怪，

ꇉꈫꇁꄿꎭ，放逐山谷间。

ꆀꁥꎰꁥꅸ，驱彝鬼汉鬼，

ꎰꃅꄃꉻꍅ，压进各坟墓。

ꄃꃅꏾꐚꅷ，驱赶婴儿鬼，

ꌩꑭꆸꈈꍅ，压在树林边。

ꌧꇗꌦꆗꅸ，驱赶致瘫鬼，

ꌿꀑꎺꀑꍅ，压在柏树边。

ꋄꑟꅉꑟꅸ，驱赶阴魂鬼，

ꄂꏂꀕꊂꍅ，压在黄云间。

ꋠꁍꋠꏮꅸ，驱赶食人鬼，

ꄂꆈꆧꊂꍅ，压在黑云外。

ꋍꏾꀘꎆꅷ，驱赶厄运鬼，

ꁭꅐꁮꐚꍅ。压在东西方。

ꈌꆹꃬꆹꅸ，逐狗鬼鸡鬼，

ꄄꁁꃪꑳꍅ，驱赶痨病鬼，

ꃪꅪꈬꊂꍅ。压在悬崖边。

ꆓꌋꏓꌋꅸ，驱赶麻风鬼，

ꎰꈜꑌꊂꍅ，压在大路边。

ꌦꎭꆅꃤꅸ，逐疾病死神，

ꒈꂪꌕꇉꍅ。压在南山间。

ꍃꃅꑙꆉꅸ，逐猴病鬼怪，

ꌩꑭꆸꈈꍅ，压在树林边。

ꑊꋌꉱꃀꅸ，逐妖魔鬼怪，

ꐗꃅꄃꉻꍅ。压在坟墓地。

ꊂꑋꌅꌠꇴ，呼唤未来神，

ꇑꌠꈁꌠꇴ，呼唤主宰神，

ꉒꌅꄏꌬꀕ，上界昊男铁铮铮，

ꉒꃀꒊꌋꀕ，上界昊女面和善，

ꉒꌅꇱꄡꌬ，昊男不留生育魂，

ꉒꂿꃏꄡꀠ。昊女不换生育魂。

ꊩꇖꑍꁋꁍ，铃声起两次，

ꌕꊨꌕꊂꈤ，三番五次呼，

ꁤꐥꀕꊂꈤ。明亮亮地起。

ꋍꁧꇉꊂꆏ，唤灵声起后，

ꃅꉒꄹꀕꁧ，北方轰地起，

ꃄꈌꄹꆺꁧ，南方轰地起，

ꏃꊰꀐꇬꄏ，救众生生命，

ꉆꊰꇇꒉꌸ。唤众生命运。

ꇱꈻꆹꂯꉔ，要为招育唤，

ꃏꈻꆹꂯꉔ，要为招喜唤，

ꃐꈻꆹꇰꃲ，正要招育魂，

ꃏꈻꆹꇰꃲ，正要招喜魂，

ꇱꈻꆹꃅꃴ，招魂在北方，

ꃏꈻꆹꃄꈌ。招魂在南方。

ꇱꇁꃎꒉꆹ，招来生育魂，

ꈀꑌꅉꇬꇴ，所到处呼唤，

ꈁꉆꅉꇬꈻ，所站处招回，

ꈻꊂꇀꎂꀕ。招之必来之。

ꇱꎹꃏꎷꆹ，寻找生育魂，

ꏃꃅꉬꉎꏭ，冥冥之上界，

ꇱꁧꇖꁧꋦ，长有四棵生育树，

ꇱꇦꇖꇦꎑ，生育枝叶有四枝，

ꇱꃨꇖꀮꅑ，开有四朵生育花，

ꇱꂷꇖꂷꅑ。结了四个生育果。

ꇱꂷꋍꂷꊰ，落下一个生育果，

ꆂꒉꈬꊂꅞ。落到江河边。

ꒉꃴꉜꏂꑌ，水里的鱼儿，

ꋍꃀꌺꉆꉐ，一母儿八百，

ꑍꃀꌺꈬꄙ，二母儿九千，

ꌕꃀꌺꋍꄜ，三母儿一万，

ꇖꃀꌺꈬꃪ，四母儿九万，

ꉬꃀꀋꊉꎴ，五母儿无数，

ꉛꇱꋇꇱꐛ，鱼育成鱼魂，

ꉛꃏꋇꃏꐛ；鱼育成鱼魄；

ꇱꂷꋍꂷꊰ，落下一个生育果，

ꌿꅶꈬꊂꅞ，落到杉树林，

ꌿꊂꐓꇌꀜ，杉林的獐麂，

ꋍꃀꌺꉆꉐ，一母儿八百，

ꑍꃀꌺꈬꄙ，二母儿九千，

ꌕꃀꌺꋍꄜ，三母儿一万，

ꇖꃀꌺꈬꃪ，四母儿九万，

ꉬꃀꀋꊉꎴ，五母儿无数，

ꇌꇱꋇꇱꐛ，獐育成獐魂，

ꐓꃏꋇꃏꐛ；麂育成麂魄；

ꇱꂷꋍꂷꊰ，落下一个生育果，

ꃪꅪꈬꊂꅞ，落到山岩边，

ꃪꅪꐛꑿꆏ，山岩的蜜蜂，

ꋍꃀꌺꉆꉐ，一母儿八百，

ꑍꃀꌺꈬꄙ，二母儿九千，

ꌕꃀꌺꋍꄜ，三母儿一万，

ꇖꃀꌺꈬꃪ，四母儿九万，

ꉬꃀꀋꊉꎴ，五母儿无数，

ꐚꇱꋇꇱꐛ，蜂育成蜂魂，

ꐚꃏꋇꃏꐛ；蜂育成蜂魄；

ꇱꂷꋍꂷꊰ，落下一个生育果，

ꏃꃅꀕꐮꅞ，落在大地上，

ꏃꃅꀕꐮꆏ，下面大地上，

ꁦꀑꎺꏂꋦ，山头长柏树，

ꎺꏂꃨꈍꀕ，柏树开繁花，

ꇱꃏꃨꈍꀕ，生育魂蓬勃。

ꑳꅶꐰꁍꋦ，屋侧长吉蒲，

ꐰꁍꃧꏢꐛ，吉蒲花艳丽，

ꇱꃏꃧꏢꐛ，生育魂艳丽。

ꒉꊩꀊꍽꋦ，沼泽长水仙，

ꀊꍽꃧꆹꀮ，水仙花朵朵，

ꇱꃏꃧꆹꀮ，生育魂朵朵。

ꉻꈫꃭꇤꃨ，园圃菜子花，

ꃭꇤꏁꇖꀕ，菜花黄澄澄，

ꇱꃏꏁꇖꀕ。生育魂澄澄。

ꒈꀑꈿꀋꁮ，水头无裂缝，

ꇱꃏꇁꆏꁮ。生育魂来开。

ꒈꂪꈿꀋꁘ，水尾无通道，

ꇱꃏꇁꆏꁘ，生育魂来通。

ꇱꋊꇱꁮꇁ，生育魂随到，

ꃏꋊꃏꍯꇁ，生育魂跟来，

ꇱꌦꇯꌋꌵ。款待生育魂。

ꉒꐎꋍꌅꄓ，起一团白雾，

ꉒꀜꃅꃴꆹ，升入天空中，

ꉎꀋꄂꐎꄩ，天空白云上，

ꈨꆨꑍꏢꊰ，落下日和月，

ꈧꌺꁧꃅꐛ，日落成主干，

ꆪꌺꏢꃅꃨ，月落成花蕾，

ꏷꌺꂷꃅꊐ，星星作穗子，

ꏢꎑꑌꏢꎔ，有花蕾就开，

ꂷꐙꑌꂷꈯ。有果就饱满。

ꈨꇁꆪꏢꊰ，落下日和月，

ꄵꇓꁦꀑꏭ，就在土尔山，

ꈭꇁꃹꄩꅞ，群雁身上落，

ꈭꌺꁧꃅꐛ，大雁成主干，

ꃹꌺꏢꃅꐛ，小雁成花蕾，

ꀋꆳꂷꃅꊐ，鸽子作子粒，

ꏢꎑꑌꏢꎔ，有花蕾就开，

ꂷꐙꑌꂷꈯ。有果就饱满。

ꈭꇁꃹꏣꊰ，大雁小雁落，

ꌿꇁꎺꄩꅞ，落到杉柏上，

ꌿꌺꁧꃅꐛ，柏树成主干，

ꎺꌺꏢꃅꃨ，杉树成花蕾，

ꌩꂷꀕꃅꊐ，树果作子粒，

ꏢꎑꑌꏢꎔ，有花蕾就开，

ꂷꐙꑌꂷꈯ。有果就饱满。

ꎺꇁꏂꏣꊰ，落下青草坡，

ꑛꇁꑿꄩꅞ，牛羊身上落，

ꑛꌺꁧꃅꐛ，牛犊成主干，

ꑾꌺꏢꃅꃨ，绵羊成枝叶，

ꍻꌺꂷꃅꊐ，山羊作子粒，

ꏢꎑꑌꏢꎔ，有花蕾就开，

ꂷꐙꑌꂷꈯ。有果就饱满。

ꑛꇁꑿꏣꊰ，落下牛和羊，

ꐎꇁꏂꄩꅞ，金银身上落，

ꐍꌺꁧꃅꐛ，银子成主干，

ꏁꌺꏢꃅꃨ，金子成花蕾，

ꊫꇷꂷꃅꊐ，绸缎作子粒。

ꏢꎑꑌꏢꎔ，根茎也壮美，

ꂷꐙꑌꂷꈯ。颗粒也饱满。

ꐎꇁꏂꏣꊰ，落下金和银，

ꊈꇁꌐꄩꅞ，姻亲身上落，

ꊈꌺꁧꃅꐛ，家族成主干，

ꌐꌺꏢꃅꃨ，姻亲成花蕾，

ꇱꃏꂷꃅꊐ，生育作子粒，

ꇱꋊꇱꐛꇁ，招魂来成魂，

ꃏꋊꃏꐛꇁ，招育来成育，

ꇱꃏꂷꐙꇁ。魂魄成子粒。

ꊂꒃꎺꌋꇬ，后来柏神魂，

ꊂꒃꁦꌋꇬ，后来山神魄，

ꊂꊐꆹꌠꅐ，后种也要出，

ꅐꇁꇱꅐꇁ，出来生魂来，

ꅐꇁꃏꅐꇁ，出来育魄来，

ꀿꒉꌺꒉꄅ，父子紧相随，

ꀿꅐꌺꁌꒉ，父亲爱孝子，

ꀿꅐꌺꐊꇁ，父亲随儿来，

ꃌꅐꒆꁌꒉ，妇爱夫和睦，

ꃌꅐꌺꐊꇁ，母亲随儿来，

ꇱꃏꒉꄅꈻ，唤来生育魂，

ꇱꅐꆗꐊꇁ，育魂跟男来，

ꃎꅐꃀꐊꇁ，育魄跟女来，

ꈬꇬꊂꑌꌠ，聚集坐后面，

ꆹꌠꃅꇱꅪ，去的都有魂，

ꇱꐊꀕꊂꅐ，生育魂跟来，

ꇱꊂꅐꇈꃅ，有魂魂出来，

ꃏꊂꅐꇁꃅ，有魄魄出来，

ꇱꐊꇁꇈꊂ，有魂跟随后，

ꃏꐊꇁꇈꊂ，有魄跟随后。

ꃅꐎꀿꌠꄓ，天上父辈起，

ꊖꆈꃀꌠꄓ，大地母亲起，

ꌭꇁꇱꌭꇁ，来留生育魂，

ꇱꒉꃏꒉꆹ，此时生育魂，

ꇱꐛꁤꃅꇁ，成魂明晃晃，

ꇱꅐꁤꇅꀕ，出魂亮堂堂，

ꃏꐛꌋꃅꇁ，成魂显稳重，

ꃏꅐꒊꌋꀕ。出魂很喜悦。

ꀋꃋꄸꃯꆏ，就在这时候，

ꆿꇁꇤꒉꈻ，招来粮食魂，

ꇱꂷꋍꂷꊰ，落下一个生育果，

ꏃꃅꀕꐮꅞ，落在大地上，

ꃭꇤꀊꃨꐛ，成了大菜花，

ꏢꐛꂷꐙꇁ，成为根与果，

ꂷꐛꂷꈯꇁ，成果果饱满，

ꂶꈯꏵꑌꇁ，饱满有果仁，

ꋇꒉꏵꑌꇁ。成簇有果仁。

ꇱꂷꋍꂷꊰ，落下生育果，

ꏃꃅꀕꐮꅞ，落在大地上，

ꐩꏂꌕꉻꐛ，成片燕麦地，

ꊪꑌꆈꋧꋪ，种时很密集，

ꅿꑌꆧꅈꅊ，长时绿茵茵，

ꃃꑌꃴꑰꀕ，薅时随风摇，

ꏢꐛꂷꐛꇁ，开花又结果，

ꂷꐛꂶꈯꇁ，结果果饱满，

ꂶꈯꏵꑌꇁ，饱满有果仁，

ꋇꒉꏵꑌꇁ。成簇有果仁。

ꇱꂷꋍꂷꊰ，落下生育果，

ꏃꃅꀕꐮꅞ，落在大地上，

ꍯꏂꌔꉻꐛ，成片谷子地，

ꊪꑌꈛꎆꀕ，种时一排排，

ꒆꑌꃴꑰꀕ，长时绿油油，

ꃃꑌꆧꅈꅊ，薅时随风摇，

ꒇꑌꏁꏪꀕ，收时黄澄澄，

ꏢꐛꂷꐛꇁ，抽穗又结果，

ꂷꐛꂷꈯꇁ，结果果饱满，

ꂶꈯꏵꑌꇁ，饱满有果仁，

ꋇꒉꏵꑌꇁ。成簇有果仁。

ꇱꂷꋍꂷꊰ，落下生育果，

ꏃꃅꀕꐮꅞ，落在大地上，

ꈾꏂꌕꉻꐛ，成片荞麦地，

ꏿꑌꆈꑰꀕ，撒时黑压压，

ꃃꑌꆧꈧꀕ，薅时绿油油，

ꒇꑌꆈꏪꀕ，收时黑压压，

ꏢꐛꂷꐛꇁ，开花又结果，

ꂷꐛꂶꈯꇁ，结果果饱满，

ꂶꈯꏵꑌꇁ，饱满有果仁，

ꋇꒉꏵꑌꇁ。成簇有果仁。

ꇤꉬꊰꑋꑟ，粮食十二种，

ꋠꇁꀑꇬꊎ，吃进头脑里，

ꀍꂷꆈꇗꀕ；头发黑油油；

ꋠꇁꑓꇬꊎ，吃进眼睛里，

ꑓꂷꀱꆫꍅ；眼珠圆溜溜；

ꋠꇁꎐꇬꊎ，吃进牙齿里，

ꎐꂷꐍꊭꀕ；牙齿白生生；

ꋠꇁꈯꇬꊎ，吃进身体里，

ꅪꁧꏁꉾꀕ；长得挺标致；

ꋠꇁꐧꇬꊐ，吃进腰杆里，

ꐧꌧꇧꄙꀕ；腰部挺有力；

ꋠꇁꑭꇬꊐ，吃进脚腿里，

ꑭꇇꐛꏂꃼ，手脚很轻巧，

ꑭꎔꈭꏂꑭ，脚腿细又长，

ꅐꅑꁯꆮꃰ，像蝴蝶翻飞，

ꐙꃰꐚꆗꏿ。像翩翩起舞。

ꂥꈐꉅꌕꁧ，木香枝三枝，

ꃰꃽꉅꌕꁧ，俄武枝三枝，

ꉘꇢꉅꌕꁧ，白桦枝三枝，

ꂥꈐꌦꑴꄉ，木香枝斜插，

ꉘꇢꌦꎤꄉ，白桦枝当锁，

ꃰꃽꌦꇈꄉ，俄武枝围栏。

ꌩꁐꇴꉘꏭ，斯拼谷火这地方，

ꎺꇁꆳꑍꁧ，柏和樱两株，

ꎺꑌꆧꏵꀕ，柏树绿茵茵，

ꆳꑌꇦꑌꀕ。樱桃很挺拔。

ꀈꉙꑗꒉꏭ，安宁河沿岸，

ꈭꇁꃹꑍꂷ，大雁和天鹅，

ꈭꑌꇳꄲꀕ，大雁鸣啾啾，

ꃹꑌꐙꐂꀕ。天鹅声清脆。

ꆺꑳꏂꃴꏭ，家庭堂屋里，

ꀘꇁꌋꑍꁯ，毕摩和主人，

ꀘꑌꈭꇐꀕ，毕摩很稳重，

ꌋꑌꒊꌋꀕ。主人很慈祥。

ꀘꃀꀗꌺꑋ，大师和毕徒，

ꇱꒉꈎꊂꆏ，招来育魂后，

ꃏꒉꈎꊂꆏ，招来育喜后，

ꀘꄑꃱꈌꈢ，毕摩起身关大门，

ꋬꂻꊂꁳꇈ。平安留主人。

ꋍꊂꈭꐨꆏ，自从这以后，

ꁍꃀꅩꒌꑌ，蒲莫妮依啊，

ꎹꄓꉒꐎꄓ，早晨起白雾，

ꁯꋒꀉꇐꒆ，下午生阿龙，

ꌦꌺꋍꆺꒆ，生下一仙子，

ꌊꌺꋍꆺꒆ。生下一神人。

ꈎꑌꇐꈎꌠ，年庚也属龙，

ꆪꑌꇐꆪꒆ，月份也属龙，

ꑍꑌꇐꑍꌠ，生日也属龙，

ꒆꑌꇐꑍꒆ，生也龙日生，

ꇐꄸꉻꇬꑟ，岁位在东南，

ꂓꑌꀉꇐꂓ。取名叫阿龙。

ꍜꇰꀉꇐꑌ，支格阿鲁啊，

ꑓꁉꃅꃴꆫ，睁眼望天空，

ꈧꌺꐎꃅꆫ，太阳白晃晃，

ꑓꏮꃅꈋꉜ，转眼望四方，

ꃅꈋꋦꃅꉜ。天真又好奇。

二、ꑍꀉꇐꀉꂿꐞ二阿龙与母亲分离

ꍜꇰꀉꇐꑌ，支格阿龙啊，

ꃀꆹꄌꈪꑌ，母亲抱在怀，

ꇇꇅꃬꀕꄉ，双手托着他，

ꁬꇁꏶꅉꃅ，爱得亲又亲，

ꁧꇉꑕꀕꄉ，脸儿贴脸儿，

ꀋꉂꀕꉨꀕ，爱得好真切，

ꀋꑟꀕꉨꀕ。爱得胜自己。

ꍜꇰꀉꇐꑌ，支格阿龙啊，

ꒆꇊꃀꋍꉔ，生后第一夜，

ꃀꆂꅝꂸꅲ，不肯吸母乳，

ꒆꇊꂾꑍꉔ，生后第二夜，

ꃀꂣꀀꂸꅲ，不肯同母睡，

ꒆꇊꂾꌕꉖ，生后第三夜，

ꃀꃢꈚꂸꅲ，不肯穿母衣，

ꉨꃅꉩꇬꎷ，整天哭不停，

ꈬꑍꉩꃅꈊ，九天哭到晚，

ꈬꉖꉩꃅꄜ。九夜哭到亮。

ꁍꃀꅩꒌꆏ，蒲莫妮依哟，

ꄹꇬꄸꆺꍬ，走在田埂边，

ꀉꇤꐛꏿꎹ，寻找阿呷草，

ꋌꎹꇿꎭꂯ？找来做什么？

ꋌꎹꀉꇐꍈ，找给阿龙吃，

ꍜꇰꀉꇐꑌ，支格阿龙啊，

ꀉꒉꐛꄾꀕ？能否长成人？

ꀉꒉꐛꂸꄿ。不能长成人。

ꁍꃀꅩꒌꑌ，蒲莫妮依啊，

ꁧꈫꁦꇌꏮ，走在山谷边，

ꁬꐎꋃꆦꈹ，寻找野草莓，

ꋌꈹꇿꎭꂯ？摘来做什么？

ꋌꈹꀉꇐꄐ，摘给阿龙吃，

ꍜꇰꀉꇐꑌ，支格阿龙啊，

ꀉꒉꐛꄾꀕ？能否长成人？

ꀉꒉꐛꂸꄿ。不能长成人。

ꁍꃀꅩꒌꑌ，蒲莫妮依啊，

ꋌꇁꀉꇐꅰ，她来哄阿龙，

ꉔ！ꉔ！ꉔ！哎！哎！哎！

ꀉꂿꌻꑘꑌ，妈妈的幺儿，

ꄡꇔꄡꇔꂸ，别纠缠好吗？

ꀉꂿꄡꇔꂸ。别纠缠妈妈。

ꇔꆹꇔꃲꆏ，若要死纠缠，

ꀉꂿꆏꇔꎼ，妈妈被纠缠，

ꀉꂿꌦꉨꆹ，妈妈若要死，

ꌩꎑꆽꏻꂵ，小心树上死，

ꀉꂿꃪꉪꆹ，妈妈想跳岩，

ꋌꍞꃪꃹꌦ。小心岩下死。

ꀉꂿꌻꑘꑌ，妈妈的幺儿，

ꄡꇔꄡꇔꂸ，请莫要纠缠，

ꀉꂿꄡꇔꂸ，别纠缠妈妈，

ꇔꆹꇔꃲꆏ，若要死纠缠，

ꀉꂿꆏꇔꎼ，妈妈被纠缠，

ꆽꏻꀋꂪꑌ，来不及上吊，

ꌩꐞꑐꁧꂵ，怕夹死树杈，

ꃪꃹꀋꂪꑌ，来不及跳岩，

ꄹꇬꐚꁧꂵ。怕坠死地埂。

ꀎ！ꀎ！ꀎ！乖！乖！乖！

ꀉꂿꌻꑘꑌ，妈妈的幺儿，

ꄡꇔꄡꇔꂸ，别纠缠妈妈，

ꀉꂿꌻꑘꑌ，妈妈的幺儿，

ꄡꇔꃅꄉꆏ，若要不纠缠，

ꄹꇭꄹꆺꏭ，田间地埂边，

ꉌꊭꁉꆪꑌ，乖巧小鸟啊，

ꀉꇐꁵꂿꂸ；要捉给阿龙；

ꀊꈚꅔꄧꏭ，阿嘎狄托边，

ꊞꀕꃪꀕꑌ，细荞面粑粑，

ꀉꇐꍈꂿꂸ。要给阿龙吃。

ꀈꉙꑗꒉꏭ，安宁河沿岸，

ꏬꏪꀜꆽꑌ，可口白米粥，

ꀉꇐꄐꂿꂸ。要给阿龙喝。

ꄄꁁꎿꆈꏭ，滇帕硕诺边，

ꉜꁯꉛꏬꑌ，大鱼小虾汤，

ꀉꇐꄐꂿꂸ。要给阿龙喝。

ꁮꐚꌕꇉꏭ，广大的西边，

ꁮꇀꐚꇨꑌ，凶猛的敌人，

ꌦꋊꏵꀖꆹ，抽骨髓献血，

ꀉꇐꄐꂿꂸ。要给阿龙喝。

ꀋꁮꇉꉱꏭ，阿布洛哈边，

ꇪꀮꌹꋒꒃ，捉对小杜鹃，

ꆎꃚꊛꂿꂵ。衬托你声音。

ꅔꐍꈬꊂꏭ，辽阔的草原，

ꏰꍸꌹꋒꒃ，捉对小云雀，

ꅽꉐꊛꂿꂸ。联结你的舌。

ꊇꀑꈬꃹꏭ，娥俄谷乌边，

ꊈꌺꇇꑭꑌ，用小熊四肢，

ꅽꇇꊛꂿꂸ。联结你的手。

ꈭꍪꍫꉘꏭ，谷冲冲洪边，

ꈭꐎꌹꋒꒃ，捉对小仙鹤，

ꅽꑭꊛꂿꂸ。联结你的脚。

ꉾ！ꉾ！ꉾ！好！好！好！

ꀉꂿꌻꑘꑌ，妈妈的幺儿，

ꄡꇔꃅꄉꆏ，若是不纠缠，

ꒉꇁꃅꋍꑍ，长大的一天，

ꆿꉐꒉꃴꏭ，拉哈依伍边，

ꆿꅪꀊꃺꒃ，捉来大狮子，

ꃅꀕꋩꂿꂸ。当作马儿骑。

ꍀꁱꏦꏪꏭ，花豹陡坡边，

ꍀꌺꆈꋓꒃ，捉来小花豹，

ꈌꃅꏃꂿꂸ。当作猎犬养，

ꄄꁁꎿꆈꏭ，滇帕硕诺边，

ꁡꉐꀉꎓꒃ，捉来大蟒蛇，

ꉛꃅꋠꂿꂸ。当作鱼儿吃。

ꀉꂿꌻꑘꑌ，妈妈的幺儿，

ꄡꇔꃅꄉꆏ，若不来纠缠，

ꄩꇴꄩꉻꆹ，上面天空中，

ꈧꇁꆪꌺꒃ，摘下日和月，

ꂸꂷꃅꄉꆹ，当作小玩具，

ꆺꀕꀨꂿꂸ。任凭你玩耍。

ꋪꀕꉬꎔꏭ，兹兹恩扎边，

ꎺꑌꃱꇌꒃ，捉来大孔雀，

ꋂꄮꃅꂿꂸ。当做菜来食。

ꃅꃴꃅꈋꏭ，天空大地上，

ꃈꊭꀉꁌꑌ，雷神阿普啊，

ꒃꄉꈩꂿꂸ。捉来做游戏。

ꄄꁁꎿꆈꏭ，滇帕硕诺边，

ꌩꃅꅏꄅꒃ，捉来神仙马，

ꃅꀕꋩꂿꂸ。当作马儿骑。

ꁍꃀꅩꒌꑌ，蒲莫妮依啊，

ꉔꄷꑌꂸꅲ，无论如何哄，

ꀎꄷꑌꂸꄿ，无论如何诓，

ꐥꄷꑌꂸꄿ，说止也不止，

ꉾꄷꑌꂸꄿ，说好也不听，

ꅰꀕꅰꂸꄿ。咋诓也不听。

ꁍꃀꅩꒌꑌ，蒲莫妮依啊，

ꋌꇔꑓꂷꏮ，被他缠伤心，

ꋌꁱꑓꂷꏂ，被他缠昏头，

ꋌꂅꇖꈭꀕ，被他缠无路，

ꋌꉩꇕꎓꀕ，被他缠心慌，

ꋌꉩꉙꄸꀕ。被他哭无奈。

ꁮꐚꌕꇉꏭ，西方天地上，

ꄤꁨꀋꃀꑌ，塔博阿莫啊，

ꃅꑞꋍꆺꉬ，是什么东西，

ꌦꃅꌊꃅꒆ，生了一神仙，

ꃆꏂꊂꑋꆏ，将来的日子，

ꋌꐥꊿꐴꍠ，它定会害人，

ꋌꐥꊿꐴꇵ。它定会毁人。

ꄤꁨꀋꃀꑌ，塔博阿莫啊，

ꂸꊪꇏꆹꊪ，选派了使者，

ꄤꁨꑘꀕꊪ，选派了牛牛，

ꅩꒌꑍꃀꒃ。捉妮依母子。

ꄤꁨꑘꀕꑌ，塔博牛牛啊，

ꅔꈋꈬꊂꆹ，辽阔的平原，

ꆿꑿꌋꃅꌋ，正好虎叼羊，

ꈥꀑꆼꏦꆹ，郭俄山哑口，

ꍿꌺꑣꃅꑣ，似盗抓小孩，

ꐷꈭꐷꇤꆹ，院坝院子里，

ꂽꉻꁏꃅꁏ，似队伍训练，

ꆺꑳꏂꃴꆹ，在家堂屋里，

ꏁꍿꃹꃅꃹ。似强盗入室。

ꅩꒌꑍꃀꑌ，妮依母子啊，

ꀀꂻꀕꈨꑭ，似做了场梦，

ꀀꑌꃅꌣꀕ，睡得正香时，

ꉘꐛꉗꄲꀕ。惊恐心直跳。

ꄳꅉꌌꅉꃅ，连抓带拉去，

ꄹꇁꎬꅉꃅ。连推带送去。

ꅩꒌꑍꃀꑌ，妮依母子啊ꐙ

ꅉꅞꅉꃅ，跌跌又撞撞，

ꌌꇈꌌꇈꃅ，拉去好一程，

ꌦꃅꃪꑳꈴ，经斯木悬崖，

ꀉꇐꅩꒌꏹ，妮依弃阿龙，

ꃪꅪꈬꊂꎭ，抛下悬崖去，

ꃀꌺꄚꄉꐞ。母子在此分。

ꃀꑌꃀꃅꁧ，母亲不愿走，

ꐙꐂꀕꃅꁧ，忧伤流泪走，

ꌺꑌꌺꃅꀀ，子也难舍留，

ꇳꄲꀕꃅꀀ。声声呼唤娘。

ꌌꌠꌌꆹꃲ，拉去被拉去，

ꅩꒌꌌꆹꃲ，妮依被拉去，

ꅞꌠꅞꇈꃲ，留的留下了，

ꀉꇐꅞꇈꃲ。阿龙被留下。

ꁍꃀꅩꒌꑌ，蒲莫妮依啊，

ꌌꆹꌌꆹꃅ，拉去被拉去，

ꉈꈌꁦꀑꈴ，经过黑克山，

ꂸꋒꇏꆹꋒ，偶遇真奇巧，

ꉈꈌꃺꏸꋒ。遇黑克伍机。

ꁍꃀꅩꒌꑌ，蒲莫妮依啊，

ꉈꈌꇈꉈꈌ，黑克啊黑克，

ꊿꑌꊾꈤꆹ，人将要过去，

ꉢꑞꑠꂷꐥ，我这平凡人，

ꄿꆏꇬꄾꀕ，最好可劝阻，

ꂸꄿꋌꄾꀕ，不行来制止，

ꄿꆏꏚꄾꀕ，最好能保释，

ꂸꄿꀵꄾꀕ，不行能赔退。

ꉈꈌꃺꏸꑌ，黑克伍机啊，

ꇬꇁꋌꂿꄷ，说是要劝阻，

ꏚꇁꀵꂿꄷ。说是要保释。

ꄤꁨꑘꀕꑌ，塔博牛牛啊，

ꑘꀕꐚꉗꉩ，牛牛真可恶，

ꑘꀕꐚꊊꒉ，牛牛真可恨。

ꇫꀕꇬꂸꄿ，劝阻也无用，

ꋋꀕꋌꂸꄿ，制止也不听，

ꏚꀕꏚꂸꅲ，保释也不干，

ꀵꀕꀵꂸꅲ。赔退也不听。

ꁍꃀꅩꒌꑌ，蒲莫妮依啊，

ꇬꇉꉗꐚꀕ，心头很忧伤，

ꄸꌋꊩꇖꀕ。内心很悲痛。

ꉈꈌꃺꏸꑌ，黑克伍机啊，

ꁈꋍꁇꈤꀕ，实在是无奈，

ꂸꇲꂸꇱꑌ。实在无情理。

ꁍꃀꅩꒌꑌ，蒲莫妮依啊，

ꌌꌠꌌꆹꃅ，拉去被拉去，

ꈨꑗꁧꇬꈴ，经过庚牛山，

ꂸꋒꇏꆹꋒ，不遇的遇上，

ꈨꑗꇢꀕꋒ。遇庚牛嘎嘎。

ꁍꃀꅩꒌꑌ，蒲莫妮依啊，

ꈨꑗꇈꈨꑗ，庚牛啊庚牛，

ꊿꑌꊾꈤꆹ，人将要过去，

ꉢꑞꑠꂷꐥ，我这平凡人，

ꄿꆏꇬꄾꀕ？最好可劝阻，

ꂸꄿꋌꄾꀕ？不行来制止，

ꄿꆏꏚꄾꀕ？最好能保释，

ꂸꄿꀵꄾꀕ？不行能赔退。

ꈨꑗꇢꀕꑌ，庚牛嘎嘎啊，

ꇬꇁꋌꂿꄷ，说是要劝阻，

ꏚꇁꀵꂿꄷ。说是要保释。

ꄤꁨꑘꀕꑌ，塔博牛牛啊，

ꑘꀕꐚꁴꍂ，牛牛这魔鬼，

ꑘꀕꐚꉌꆊ，牛牛这恶霸，

ꇫꀕꇬꂸꄿ，劝阻也无用，

ꋋꀕꋌꂸꄿ，制止更不理，

ꏚꀕꏚꂸꄿ，保释也不干，

ꀵꀕꀵꂸꄿ。赔退也不听。

ꁍꃀꅩꒌꑌ，蒲莫妮依啊，

ꑓꁴꑰꀕꇤ，眼泪簌簌流，

ꁴꐎꆺꀕꂃ，泪珠潸潸下，

ꇇꏸꁴꑓꄡ，手指挡泪水。

ꑓꁴꄧꀕꊰ，泪水如泉涌，

ꇇꌋꁴꑓꁻ。指甲弹泪水。

ꀊꇷꇈꀊꇷ，可恶啊可恶，

ꄸꈐꄏꄷꊰ，内心很失望，

ꇇꇤꍠꀕꑣ。拍手啪啪响。

ꁍꃀꅩꒌꑌ，蒲莫妮依啊，

ꌌꌠꌌꆹꃲ，拉去被拉去，

ꉗꁌꈬꊐꈴ，经过大山脉，

ꁮꐚꌕꇉꎤ，西方天地阻，

ꁮꐚꌕꇉꆏ，西方天地啊，

ꃱꆹꈬꊐꄀ，有九道大门，

ꃱꆹꈬꊐꌠ，九道大门啊，

ꈁꉜꊪꇖꀕ，的确很结实，

ꎤꁉꈬꋬꄀ，锁了九把锁，

ꎤꁱꎤꉐꆹ，各种锁具啊，

ꉜꑌꊪꇖꀕ，看也很结实，

ꂸꉜꊪꇖꀕ。不看很结实。

ꄹꀧꃘꑴꑌ，看守大恶狗，

ꉼꏑꀕꃅꐏ。凶巴巴地守。

ꁍꃀꅩꒌꑌ，蒲莫妮依啊，

ꉂꐒꉁꋩꆹ，忧愁又烦闷，

ꏦꑳꃹꁧꃲ。进了大监狱。

ꉌꐒꇁꎭꆹ，发愁又忧伤，

ꏃꃅꆈꋧꋪ。天地黑沉沉。

ꄸꅣꄷꑣꆹ，捶胸又蹬脚，

ꈺꍠꀕꃅꀀ，冷冰冰地睡，

ꂸꇲꂸꇱꀀ，不安稳地睡，

ꀉꂿꎮꑑꅉ。真是太可怜。

ꌦꃅꃪꑳꑌ，斯木山岩啊，

ꃪꇴꃪꆹꎴ，连绵的山脉，

ꐛꑿꄚꐥꌠ，岩上的蜜蜂，

ꈬꑍꈬꉖꐚ，飞九天九夜，

ꋌꐚꁍꂸꇔ。飞不出山岩。

ꃪꊂꇐꋦꇈ，岩上住有龙，

ꀉꇐꀕꏣꑟ，阿龙之亲戚，

ꇐꉙꀉꇐꌧ，阿龙识龙语，

ꇐꑌꇐꂿꈬ，龙也很高兴，

ꇐꂿꑘꏵꀕ。龙见阿龙欢。

ꀉꇐꀕꂿꈬ，阿龙见龙喜，

ꇐꂿꂱꉙꀕ。见龙很规矩。

ꋌꊂꈭꐨꆏ，从此被龙养，

ꍜꇰꀉꇐꑌ，支格阿龙啊，

ꌤꑍꇐꑍꅝ，渴时喝龙奶，

ꂮꑍꇐꋚꋠ，饿时吃龙饭，

ꈠꑋꇓꂱꈚ。冷时穿龙衣。

ꍜꇰꀉꇐꑌ，支格阿龙啊，

ꋌꊂꇁꈭꐨ，自从那以后，

ꃀꇁꌺꐞꅐ，母子就分离，

ꂸꇲꂸꇱꅐ。不情愿分手。

ꎹꀕꀉꁌꑌ，神仙老人啊，

ꋌꇁꀉꇐꂘ，前来教阿龙，

ꅡꈭꀋꃀꆹ，真知的德古，

ꀒꈥꐬꇓꁮ，聪明又智慧，

ꑠꂷꐥꂸꇮ。实在很少见。

ꃬꀮꄇꏸꆹ，名公鸡达吉，

ꀋꀀꃅꀕꄜ，不睡到天亮，

ꑠꂷꐥꂸꇮ。如此报晨晓。

ꐛꃽꀋꎑꌠ，无刺的蜜蜂，

ꑬꆏꇁꀋꇬ，勤劳的蜜蜂，

ꑠꂷꐥꂸꇮ。没有这种蜂。

ꊿꐥꇫꐥꌠ，在世的人们，

ꌶꌺꆹꐥꇮ，只有学而知，

ꌧꌺꐥꂸꇮ。没有生而知。

ꐧꌺꐺꅉꐯ，人类走得宽，

ꌧꇐꐋꄩꎆ，知识比友多。

ꏨꆉꃰꅉꐯ，老鹰飞得宽，

ꅝꇐꐋꄩꎆ，食物比友多。

ꍀꆿꏹꅉꐯ，虎豹跑得宽，

ꋠꇐꐋꄩꎆ。食物比友多。

ꀋꌧꀕꋒꃅ，不懂又装懂，

ꀋꇮꀕꋒꃅ，不会又装会，

ꀋꎔꀕꋒꃅ，不美又装美，

ꀋꀺꀕꋒꃅ，装作有礼貌，

ꀋꉩꀕꋒꃅ，不哭装伤心，

ꀋꒉꒈꋒꃅ。不笑装笑样。

ꇮꌺꇮꂸꒃ，不学技艺者，

ꇮꃅꇁꋍꑍ，做技艺之时，

ꎷꄂꁡꊭꋖ，铁锤碎膝盖，

ꑭꆹꌦꅪꈘ。腿脚血淋淋。

ꀉꐔꋩꂸꒃ，姑娘不学纺，

ꎭꋩꇁꋍꑍ，纺线的一天，

ꎭꃹꇁꑓꊴ，纺锤伤眼睛，

ꑓꁴꐍꈘꀕ。眼泪滚滚流。

ꎃꎂꂿꂸꒃ，百姓不学耕，

ꇌꂿꇁꋍꑍ，犁地的一天，

ꆹꈈꊖꄩꃰ，铧口露地面，

ꇂꁱꉌꅛꊐ。耕牛生怨心。

ꈌꃅꈹꂸꒃ，猎狗不学撵，

ꉆꈹꇁꋍꑍ，放猎的一天，

ꈌꃅꂴꈴꁧ，猎狗跑在前，

ꑌꇁꉆꁮꑌ，猎物被丢失，

ꋋꐥꊂꊰꇈ。野兽躲在后。

ꍜꇰꀉꇐꑌ，支格阿龙啊，

ꂘꇁꑴꅇꃅ。虚心受教育。

三、ꌕꀉꇐꅿꉀꒆ，三阿龙的成长

ꍜꇰꀉꇐꑌ，支格阿龙啊，

ꒆꇊꂾꋍꈓ，长到一岁时，

ꃢꆫꌠꊂꁠ。跟随放猪娃。

ꃢꆫꀉꑳꑌ，牧童放猪娃，

ꏮꒉꏮꇁꃅ，寻来又寻去，

ꂷꍲꌭꐰꑟ，到金竹林边，

ꂷꍲꌭꐰꆏ，金竹林边啊，

ꂷꍲꄚꋦꌠ，这里长的竹，

ꋦꑌꅔꇬꋦ，长在陆地上，

ꉧꅉꀛꅉꑟ，韧性弹性好，

ꄳꑌꀍꀋꉞ，扳也不摇头，

ꍟꑌꐴꀋꄓ。拔也不起根。

ꃢꆫꀉꑳꑌ，牧童放猪娃，

ꏮꇁꂶꀑꉜ，抬头看竹梢，

ꂶꀑꇦꑐꀕ，竹梢很茂盛，

ꏮꇁꂷꑭꉜ，低头看竹根，

ꂷꑭꄵꋓꀕ。竹根很密集。

ꃢꆫꀉꑳꑌ，牧童放猪娃，

ꌋꇈꌋꇈꃅ，选了又精选，

ꇨꌠꋍꄿꐊ，硬的有一节，

ꋊꇁꅔꉈꅞ，取下这一节，

ꂷꁐꉹꃅꄻ，竹片做弯弓，

ꏝꅍꉈꃅꄻ，草秆做箭弩，

ꌌꇁꀉꇐꁵ。拿来送阿龙。

ꍜꇰꀉꇐꑌ，支格阿龙啊，

ꂷꁐꉹꃅꌌ，竹片当弯弓，

ꏝꅍꉈꃅꌊ，草秆当箭弩，

ꄹꇭꄹꆺꍬ，走在田埂上，

ꐛꊪꑓꅪꁻ，用来射雀鸟。

ꋍꇅꄝꎼꒉ，放了第一箭，

ꂸꌸꇏꆹꌸ，中得很奇妙，

ꊍꇴꐔꊂꌸ，射中了鸟颈，

ꊍꑐꁌꀕꇖ，鸟毛纷纷落，

ꊍꌦꄧꀕꊰ，鸟血点点滴，

ꊍꂿꆺꀕꂃ。鸟尸团团滚。

ꃢꆫꀉꑳꑌ，牧童放猪娃，

ꋌꇁꀉꇐꏭ，对着阿龙说，

ꄡꁻꋌꄡꁻ，请不要射它，

ꆊꍧꋠꂯꑌ，要想挑肉吃，

ꈁꊎꑌꂸꇎ，不够一大口，

ꊈꋊꂯꇬꑌ，要想啃骨头，

ꈌꁵꑌꂸꇎ。没有狗的份。

ꍜꇰꀉꇐꑌ，支格阿龙啊，

ꒆꊂꂾꑍꈓ，长到两岁时，

ꁮꆫꌠꊂꁠ。跟着牧羊人。

ꑿꆫꀉꁌꑌ，牧羊老人啊，

ꁦꀑꇈꀑꏭ，走在山谷间，

ꁦꀑꇈꀑꆏ，在山谷深处，

ꌡꌠꄚꋦꌠ，这里的素素，

ꋦꑌꁦꀑꋦ，长在山顶上，

ꉧꑌꁳꇖꀕ，弯也韧性好，

ꄳꑌꀑꂸꉞ，扳也头不摆，

ꍠꑌꐴꂸꄓ。拔也根不起。

ꑿꆫꀉꁌꑌ，牧羊老人啊，

ꏮꇁꌩꀑꉜ，抬头看树梢，

ꌩꀑꇦꉾꀕ，树梢很茂盛，

ꏮꇁꌩꑭꉜ，低头看树根，

ꌩꑭꄵꋓꀕ。树根很密集。

ꑿꆫꀉꁌꑌ，牧羊老人啊，

ꋌꌌꉹꃅꄻ，用来做弯弓，

ꄿꌠꋍꁧꐊ，好的有一棵，

ꌡꌠꉹꃅꄻ，素素做弯弓，

ꂷꅍꉈꃅꄻ，竹竿做箭条，

ꌌꇁꀉꇐꁵ。拿来送阿龙。

ꍜꇰꀉꇐꑌ，支格阿龙啊，

ꌩꉧꉹꃅꌊ，扳树做弯弓，

ꂷꅍꉈꃅꌊ，竹竿做箭条，

ꈭꋇꈭꇍꏮ，跟着雁群转，

ꎽꇁꉐꌺꁻ。射锦鸡雉鸡。

ꍜꇰꀉꇐꑌ，支格阿龙啊，

ꋍꇅꄝꇬꆏ，一箭射出去，

ꂸꌸꇏꆹꌸ，射得很奇妙，

ꎼꇴꐔꊂꌸ，射中雉鸡颈，

ꎼꑐꁋꀕꐚ，雉鸡毛飘落，

ꎽꌦꄧꀕꊰ，鲜血点点滴，

ꎽꂿꆺꀕꂃ。死尸团团滚。

ꎽꇁꉐꎸꑌ，锦鸡雉鸡肉，

ꋠꑌꑬꏻꀕ，吃也很鲜美，

ꂸꋠꑬꏻꀕ。不吃也鲜美。

ꁮꆫꌠꇁꉉ，牧人传消息，

ꀒꈓꑠꃅꁻ，头年这样射，

ꊂꈎꑠꃅꁻ。来年这样射。

ꍝꇯꀉꇐꑌ，支格阿龙啊，

ꋌꒆꋌꒈꐛ，渐渐长成人，

ꈛꎼꌠꊂꁠ。跟着出门人。

ꃅꇗꋋꄮꆏ，长到这时候，

ꆧꁨꄆꌤꐛ，胳膊长得粗，

ꌡꌠꉹꃅꌊ，素素做弯弓，

ꊋꅐꁻꑌꐔ，出力弓就断，

ꊋꇤꁻꑌꈘ。用力线就断。

ꈜꎼꌠꇁꉉ，行人来传讯，

ꀉꇐꇈꀉꇐ，阿龙啊阿龙，

ꃅꇁꈄꂯꆏ，要成为勇士，

ꌦꉹꌊꄉꈄ，神弓显勇敢，

ꌋꉹꌊꄉꈄ。神箭显英雄。

ꌦꉹꌋꉹꆹ，神弓神箭啊，

ꇈꂪꌕꇉꏭ，深山密林处，

ꁧꏡꈢꆹꆏ，高山峡谷中，

ꌩꋦꌦꌋꋦ，长有神仙树，

ꌦꉹꌋꉹꋦ，长着神弓箭，

ꋌꂾꐺꌠꈔ，在它前的亡，

ꋌꊂꐥꌠꐬ。在它后的怕。

ꊿꇴꀕꂸꉆ，喊人又不能，

ꇴꆹꇴꇮꇬ，若要喊的话，

ꋌꁻꄧꀕꌦ。无疑被射死。

ꉘꆹꉘꇮꇬ，若要叫的话，

ꋌꁻꁌꀕꈔ，被它射中亡，

ꃅꇁꁈꂸꊌ，实在无办法，

ꄿꆏꄚꀖꆹ，行则去取回，

ꂸꄿꇫꆦꆹ。不行则祭供。

ꍜꇰꀉꇐꑌ，支格阿龙啊，

ꆹꇈꆹꇈꃅ，走着又走着，

ꈢꆽꁦꀑꑟ。来到果乃山。

ꈢꆽꌩꄿꑌ，果乃斯打树，

ꂵꇖꀕꃅꋦ，长得很奇妙，

ꌩꋦꐧꏮꋦ，树干横着长，

ꌩꋦꉘꇕꀕ。长得很茂盛。

ꍜꇰꀉꇐꑌ，支格阿龙啊，

ꃅꐬꋍꂷꇵ，挖出个地洞，

ꋌꆹꃅꐬꉆ，站在地洞边，

ꀒꄷꌕꇬꇴ，大喊了三声，

ꁻꉹꋍꇅꄝ，张弓放一箭，

ꀉꇐꀑꊂꌸ，射在头周围，

ꆲꏂꁌꀕꄓ。扬起一阵风。

ꍜꇰꀉꇐꑌ，支格阿龙啊，

ꂿꐚꂿꂸꐛ，看清又非清，

ꉜꐚꉜꂸꐛ。看准又非准。

ꍜꇰꀉꇐꑌ，支格阿龙啊，

ꊁꇁꋍꑍꆏ，后来有一天，

ꃅꐬꋍꂷꇵ，又挖口地洞，

ꆗꌺꋍꂷꊪ，派个年轻人，

ꃅꐬꋍꂷꀀ。住在此洞中。

ꆗꌺꋋꂷꑌ，这个年轻人，

ꀂꄷꌕꇬꉘ，吼了三大声，

ꌩꁧꉘꇕꀕ，树林长茂密，

ꃱꀖꉧꑳꀕ，弯弓撑得圆，

ꉹꏣꁳꇖꀕ，弓弦紧绷绷，

ꋍꇅꄝꇬꆏ，放出一箭时，

ꂸꌸꇏꆹꌸ，射得很奇妙，

ꊾꇴꐔꊂꌸ，射中人身上，

ꊾꌦꄧꀕꊰ，人血点点滴，

ꊾꂿꆺꀕꂃ，人尸滚成团，

ꊾꌦꀷꇙꀕ。人血直流淌。

ꍜꇰꀉꇐꑌ，支格阿龙啊，

ꂿꑌꂿꐚꃲ，瞧也瞧得清，

ꉜꑌꉜꐚꃲ。看也看得清。

ꍜꇰꀉꇐꑌ，支格阿龙啊，

ꐈꇁꐈꇁꃅ，变化又无常，

ꆲꏂꋍꄵꐛ，变成一股风，

ꆳꏂꌩꀑꇙ，旋风卷树梢，

ꉹꏣꍠꄷꈘ。弓弦齐声断。

ꋌꊂꈭꐨꆏ，自从这以后，

ꉬꎆꁧꃴꊿ，恩哲山下人，

ꊿꇿꇖꈭꀕ，人们喜颜开，

ꍶꒃꍶꉾꆹ，牵羊又宰羊，

ꀉꇐꆦꂿꄷ。要款待阿龙。

ꍜꇰꀉꇐꑌ，支格阿龙啊，

ꆦꒃꑌꂸꅲ，不肯受款待，

ꆦꋠꑌꂸꅲ。不肯吃款待。

ꍜꇰꀉꇐꑌ，支格阿龙啊，

ꂸꊪꇏꆹꊪ，选派好差使，

ꆗꌺꈬꑻꊪ，派了九青年，

ꃤꃀꈬꏼꌊ，拿九把斧子。

ꍶꌦꍶꌋꌩ，山羊神仙树，

ꈢꆽꏁꄿꌩ，果乃史打树，

ꌩꐦꈬꐦꐛ，砍下九节树，

ꆗꌺꈬꑻꌠ，九个年轻人，

ꋍꂷꋍꐦꀵ，一人背一节，

ꀵꇁꀵꇁꃅ，背来又背来，

ꌩꃅꈂꄨꑟ，到斯木喀托。

ꂴꆽꋍꐦꋲ，先劈开一节，

ꂸꀀꇏꆹꀀ，有一根好弓，

ꉹꀮꋍꏢꀀ，有一根雄弓，

ꏂꃅꏁꇅꀕ，颜色金灿灿，

ꈁꌂꑒꑷꇁ。光泽耀眼睛。

ꍜꇰꀉꇐꑌ，支格阿龙啊，

ꋌꇁꉧꉜꇬ，用力弯着看，

ꉧꑌꁳꇖꀕ，弯则韧性好，

ꂸꉧꁳꇖꀕ，不弯韧性好，

ꊁꇁꋍꐦꋲ，再劈开一节，

ꂸꀀꇏꆹꀀ，藏有特别物，

ꉹꏡꋍꏢꀀ，有一根弓弦，

ꉹꏡꋋꏢꑌ，这根弯弓弦，

ꋌꃢꌩꆽꁱ，它缠在树上，

ꉜꑌꑅꇖꀮ，看也绷得紧，

ꂸꉜꑅꇖꀮ。不看绷得紧。

ꍜꇰꀉꇐꑌ，支格阿龙啊，

ꏂꇁꄀꅉꃅ，绷了又绷紧，

ꐁꏂꇖꈭꀕ。弓声响悠扬。

ꉈꑴꋍꐦꋲ，后又劈一节，

ꂸꀀꇏꆹꀀ，藏有特别物，

ꉈꊈꋍꊫꀀ，有一簇箭条，

ꉈꊈꋍꊨꑌ，这一簇箭条，

ꉈꊈꁵꄿꋒ。只剩根箭杆。

ꊁꇁꋍꐦꋲ，后又劈一节，

ꂸꀀꇏꆹꀀ，藏有特别物，

ꉈꂷꀐꆹꀀ，有根平箭头，

ꉈꂷꀐꆹꑌ，这根平箭头，

ꁻꈩꉇꃅꄉ。专做习武箭。

ꊁꇁꋍꐦꋲ，后又劈一节，

ꂸꀀꇏꆹꀀ，藏有特别物，

ꁻꀱꇇꋦꀀ，有块护肘套，

ꁻꀱꏁꍅꀕ，护肘黄灿灿，

ꍜꇰꀉꇐꑌ，支格阿龙啊，

ꁻꀱꇇꆹꅑ，护肘套手臂，

ꇇꆹꀨꈩꀕ。手臂力量足。

ꊁꇁꋍꐦꋲ，后又劈一节，

ꂸꀀꇏꆹꀀ，藏有特别物，

ꉹꑳꋍꆺꀀ，有一堆箭筒，

ꉹꑳꈹꍅꀕ。箭筒很精美。

ꋌꊂꇀꈭꐨ，自从这以后，

ꍜꇰꀉꇐꑌ，支格阿龙啊，

ꌦꉹꌋꉹꌊ，佩带神弯弓，

ꏂꄿꉹꃅꌊ，金棒饰弯弓，

ꌦꉈꌊꉈꌊ，搭着神箭条，

ꎸꏫꉈꃅꌊ，铁棒做箭杆。

ꍜꇰꀉꇐꑌ，支格阿龙啊，

ꌉꈿꊤꀕꑌ，作战知进退，

ꁻꈿꄜꀕꉆ。射箭懂其法。

ꍜꇰꀉꇐꑌ，支格阿龙啊，

ꌿꉘꈬꊂꈴ，经过杉树林，

ꐓꇁꇍꌺꁻ，用弓射獐麂。

ꋍꇅꄝꃯꇬ，放出一箭时，

ꂸꌸꇏꆹꌸ，射得真奇妙，

ꉆꇴꐔꊂꌸ，射中兽颈部，

ꉆꑐꁌꀕꄓ，兽毛纷纷落，

ꉆꌦꄧꀕꊰ，兽血点点滴，

ꉆꂿꆺꀕꂃ。兽尸滚成团。

ꈛꎼꌠꇁꇬ，行人来劝阻，

ꄡꁻꋌꄡꁻ，请不要射它，

ꃚꄉꋠꂯꑌ，欲将烧来吃，

ꇤꈏꋌꂸꅓ，火塘容不下，

ꏬꄉꋠꂯꑌ，欲将煮来吃，

ꉽꐯꋌꂸꅓ。锅儿容不下。

ꍜꇯꀉꇐꑌ，支格阿龙啊，

ꒆꃅꒅꆹꑟ，渐渐在成长，

ꃆꉉꌟꊂꁠ，跟随调解人。

ꃆꉉꀉꁌꉉ，调解人阿普，

ꀉꇐꇈꀉꇐ，阿龙啊阿龙，

ꃅꇁꈄꂯꆹ，若要成英雄，

ꌦꑣꈚꄉꈄ，穿着神铠甲，

ꌊꑣꈚꄉꈄ，穿着仙铠甲，

ꌦꑣꌊꑣꆹ，神铠神甲啊，

ꋪꀕꃪꑳꎑ，在兹兹岩洞，

ꄿꆏꇬꌵꆹ，行则前去取，

ꂸꄿꇫꆦꆹ。不行去祭祀。

ꍜꇰꀉꇐꑌ，支格阿龙啊，

ꋌꈨꆹꇈꉈ，听到这些后，

ꑌꈨꑌꃅꄑ，闻声就站立，

ꉆꈨꉆꃅꄑ。闻讯就启程。

ꈌꃅꋍꋉꏃ，领群好猎犬，

ꑣꎹꆹꂿꄷ，要去找铠甲，

ꃅꈋꄏꊂꏮ。到处去寻找。

ꍜꇰꀉꇐꑌ，支格阿龙啊，

ꆹꇈꆹꇈꃅ，走着又走着，

ꌿꉘꈬꊂꈴ，经过杉树林，

ꌿꉘꈬꄅꀺ，穿过九层林，

ꈁꊋꊊꃅꀺ。成功而穿越。

ꍜꇰꀉꇐꑌ，支格阿龙啊，

ꂸꋒꇐꆹꋒ，遇得真奇妙，

ꍶꁱꎽꅪꋒ，遇上紫公羊，

ꈌꇔꉆꊂꇱ，放狗追野兽，

ꋧꈹꀊꋧꒃ，撵羊又捉羊，

ꋧꒃꀊꋧꉾ，捉羊后剥皮，

ꋧꆱꌕꏢꐒ。剥出三气袋。

ꍜꇰꀉꇐꑌ，支格阿龙啊，

ꆹꇈꆹꇈꃅ，走着又走着，

ꆈꒉꒊꃀꋒ，遇上大江河，

ꆱꀱꌕꏢꄻ，做三根气袋，

ꆱꀱꐧꊂꄀ，气袋系腰间，

ꈌꃅꄩꅞꀵ，猎狗托在肩，

ꆈꒉꄩꏸꏽ。飘浮于水面。

ꍜꇰꀉꇐꑌ，支格阿龙啊，

ꆹꇈꆹꇈꃅ，走着又走着，

ꋪꀕꇂꐞꑟ，到兹兹纳甲，

ꋪꀕꇂꐞꆏ，兹兹纳甲啊，

ꈌꃅꏣꇔꁧ，放狗野山间，

ꋌꁧꋋꃅꁧ，它就这样去，

ꀒꑍꀱꀕꉚ，头日望返回，

ꀒꑍꑌꂸꀱ，头日也不返，

ꊂꑋꀱꀕꉚ，次日望返回，

ꊂꑋꑌꂸꀱ。次日也不回。

ꍜꇰꀉꇐꑌ，支格阿龙啊，

ꈌꎹꈌꂸꊌ，找狗不见狗，

ꐥꋒꁧꎻꈁ。以为玩斗去。

ꋌꊂꇀꈭꐨ，自从这以后，

ꋍꑍꈌꃚꈨ，头日闻狗叫，

ꈧꌦꂸꈨꌦ，隐隐约约声，

ꑍꀕꈌꋓꈨ，后日闻狗斗，

ꈧꌦꂸꈨꌦ，隐隐约约声，

ꈨꇈꈨꇈꃅ，闻之又闻之，

ꈌꃅꋋꋉꑌ，这群猎狗啊，

ꋪꀕꃪꑳꋓ，在兹兹岩洞，

ꂴꆽꋍꑍꋓ，先斗了一天，

ꀋꋍꋓꎻꈁ，以为是玩斗，

ꀋꉬꋒꎻꈁ，以为是耍斗，

ꈌꀱꇁꀕꉚ，望猎狗返回，

ꈌꀱꂸꇁꃲ。猎狗未返回。

ꊁꇁꋍꑍꋓ，后又斗一天，

ꊴꐷꋓꎻꈁ，以为是斗鹿，

ꁠꅆꋓꎻꈁ，以为是乱斗，

ꈌꀱꇁꀕꉚ，望猎狗返回，

ꈌꀱꂸꇁꃲ。猎狗未返回。

ꊁꇁꋍꑍꋓ，再后斗一天，

ꇍꀮꋓꎻꈁ，以为斗公獐，

ꍫꐎꋓꎻꈁ，以为斗獐子，

ꈌꀱꇁꀕꉚ，望猎狗返回，

ꈌꀱꂸꇁꃲ。猎狗未返回。

ꋌꊂꇀꈭꐨ，自从这以后，

ꍜꇰꀉꇐꑌ，支格阿龙啊，

ꈌꎹꈌꈹꆹ，去寻找猎狗，

ꆹꇈꆹꇈꃅ，走着又走着，

ꋪꀕꃪꑳꑟ，到兹兹岩洞，

ꈌꋓꄱꃅꋓ，猎狗斗什么？

ꈌꋓꑣꋓꑌ。猎狗咬什么？

ꍜꇰꀉꇐꑌ，支格阿龙啊，

ꏮꇁꃪꀑꉜ，抬头望山头，

ꑣꃀꌕꋇꅑ。挂着三铠甲。

ꑣꀑꋍꋇꆹ，大套铠甲啊，

ꑣꀑꅩꋝꀕ，铠甲红彤彤，

ꑣꐧꋍꋇꆹ，中套铠甲啊，

ꑣꐧꏁꇅꀕ，铠甲黄灿灿，

ꑣꂪꋍꋇꆹ，小套铠甲啊，

ꑣꂪꆈꏸꀕ。铠甲黑漆漆。

ꍜꇰꀉꇐꑌ，支格阿龙啊，

ꌦꑣꌊꑣꆹ，摘取神铠甲，

ꑣꀑꆎꋍꋇ，这套大铠甲，

ꀉꇐꑣꉫꀕ？属于阿龙吗？

ꀉꇐꑣꉬꆏ，若是阿龙的，

ꊰꇁꑣꊰꇁ。铠甲落下吧。

ꍜꇰꀉꇐꑌ，支格阿龙啊，

ꏂꏾꍔꄉꈈ，展开披毡接，

ꆞꑭꍔꄉꈈ。展开裤脚接。

ꑣꀑꑢꅪꑌ，大套红铠甲，

ꁍꀕꋍꇅꇤ，抖动了一阵，

ꑣꊰꇁꅲꀕ？铠甲肯落吗？

ꑣꊰꇁꂸꅲ。铠甲不肯落。

ꍜꇰꀉꇐꑌ，支格阿龙啊，

ꇌꎶꐎꒃꆦ，用白牛来祭，

ꍫꀕꇖꏢꏻ，砍来四青枝，

ꃄꇖꎏꇬꍣ，插在四方位，

ꎸꃚꉘꁇꁉ，祭品热腾腾，

ꇌꌦꇖꇱꃬ，抓四把牛血，

ꃄꇖꎏꇬꁊ，撒在四方位，

ꇌꌦꉐꌦꌵ。牛血似雨滴。

ꍜꇰꀉꇐꑌ，支格阿龙啊，

ꌦꑣꌊꑣꆹ，神铠神甲啊，

ꑣꀑꆎꋍꋇ，这套大铠甲，

ꀉꇐꑣꉫꀕ？属于阿龙吗？

ꀉꇐꑣꉬꆏ，若是阿龙的，

ꊰꇁꑣꊰꇁ，落下快落下。

ꍜꇰꀉꇐꑌ，支格阿龙啊，

ꏂꏾꍔꄉꈈ，展开披毡接，

ꆞꑭꍔꄉꈈ。展开裤脚接。

ꑣꀑꑢꅪꑌ，大套红铠甲，

ꁍꀕꌕꇅꇤ，抖动了三阵，

ꑣꊰꇁꅲꀕ？铠甲肯落吗？

ꑣꊰꇁꂸꅲ。铠甲不肯落。

ꍜꇰꀉꇐꑌ，支格阿龙啊，

ꁮꅰꐎꒃꆦ，用白阉羊祭。

ꍫꀕꇖꏢꏻ，砍下四青枝，

ꃄꇖꎏꇬꍣ，插在四方位，

ꎸꃚꉘꁇꁉ，祭品热腾腾，

ꁮꌦꇖꇱꃬ，抓四把羊血，

ꃄꇖꎏꇬꁊ，撒在四方位，

ꁮꌦꉐꌦꌵ。羊血似雨滴。

ꍜꇰꀉꇐꑌ，支格阿龙啊，

ꌦꑣꌊꑣꆹ，神铠神甲啊，

ꑣꀑꆎꋍꋇ，大套铠甲啊，

ꀉꇐꑣꉫꀕ？属于阿龙吗？

ꀉꇐꑣꉬꆏ，若是阿龙铠，

ꊰꇁꑣꊰꇁ，落下快落下，

ꍜꇰꀉꇐꑌ，支格阿龙啊，

ꏂꏾꍔꄉꈈ，展开披毡接，

ꆞꏾꍔꄉꈈ，展开裤脚接。

ꑣꀑꑢꅪꑌ，大套红铠甲，

ꁍꀕꏃꇇꇤ，抖动了七阵，

ꑣꊰꇁꅱꀕ？铠甲肯落吗？

ꑣꊰꇁꂸꅲ。铠甲不肯落。

ꍜꇰꀉꇐꑌ，支格阿龙啊，

ꃪꀮꐎꒃꆦ。。白公鸡来祭。

ꍫꀕꇖꏢꏻ，砍来四青枝，

ꃄꇖꎏꇬꍣ，插在四方位，

ꎸꃚꉘꁇꁉ，祭品热腾腾，

ꃬꑐꇖꇱꍠ，拔四把鸡毛，

ꃄꇖꎏꇬꁊ，撒在四方位，

ꃬꑐꉒꐎꄓ。鸡毛似白云。

ꌦꑣꌊꑣꆹ，神铠神甲啊，

ꑣꀑꆎꋍꋇ，大套红铠神，

ꀉꇐꑣꉫꀕ？属于阿龙吗？

ꀉꇐꑣꉬꆏ，若是阿龙铠，

ꊰꇁꑣꊰꇁ，落下快落下，

ꍜꇰꀉꇐꑌ，支格阿龙啊，

ꏂꏾꍔꄉꈈ，展开披毡接，

ꆞꏾꍔꄉꈈ，展开裤脚接，

ꑣꀑꑢꅪꑌ，大套红铠甲，

ꁍꀕꈬꇇꇤ，拖动了九阵，

ꑣꊰꇁꅱꂸ？铠甲肯落吗？

ꑣꊰꇁꂸꅲ。铠甲不肯落。

ꍜꇰꀉꇐꑌ，支格阿龙啊，

ꌦꑣꌊꑣꆹ，神铠神甲啊，

ꑣꀑꆎꋍꋇ，这套大铠甲，

ꃅꃴꃅꈋꏭ，南方北方啊，

ꌦꌋꑣꉫꀕ？有神铠甲吗？

ꌦꌋꑣꉬꆏ，若有神铠甲，

ꌦꑣꌦꅍꍯ，神铠归神处，

ꌋꑣꌋꅍꐰ，仙铠归仙处。

ꑣꀑꑣꅪꑌ，大套红铠甲，

ꁍꀕꐚꃅꄓ，抖动着飞起，

ꋌꄓꃅꃴꃹ。飞去了南方。

ꍜꇰꀉꇐꑌ，支格阿龙啊，

ꌦꑣꌊꑣꆹ，神铠神甲啊，

ꑣꐧꆏꋍꋇ，中套铠甲啊，

ꀉꇐꑣꉬꆏ，属于阿龙铠，

ꊰꇁꑣꊰꇁ，落下铠落下，

ꍜꇰꀉꇐꑌ，支格阿龙啊，

ꏂꏾꍔꄉꈈ，展开披毡接，

ꆞꏾꍔꄉꈈ，展开裤脚接。

ꑣꐧꑣꏂꑌ，中套黄铠甲，

ꁍꀕꋍꇅꇤ，抖动了一阵，

ꑣꊰꇁꅱꀕ？铠甲肯落吗？

ꑣꊰꇁꂸꅲ。铠甲不肯落。

ꍜꇰꀉꇐꑌ，支格阿龙啊，

ꇌꎶꐎꒃꆦ，用白阉牛祭。

ꍫꀕꇖꏢꏻ，砍来四青枝，

ꃄꇖꎏꇬꍣ，插在四方位，

ꎸꃚꉘꁇꁉ，祭品热腾腾，

ꇌꌦꇖꇱꃬ，抓四把牛血，

ꃄꇖꎏꇬꁊ，撒在四方位，

ꇌꌦꉐꌦꌵ。牛血似雨滴。

ꌦꑣꌊꑣꆹ，神铠神甲啊，

ꑣꐧꆎꋍꋇ，这套中铠甲，

ꀉꇐꑣꉫꀕ？属于阿龙吗？

ꀉꇐꑣꉬꆏ，若是阿龙铠，

ꊰꇁꑣꊰꇁ，落下快落下。

ꍜꇰꀉꇐꑌ，支格阿龙啊，

ꏂꏾꍔꄉꈈ，展开披毡接，

ꆞꏾꍔꄉꈈ，展开裤脚接。

ꑣꐧꑣꏂꑌ，这套铠甲啊，

ꁍꀕꌕꇇꇤ，抖动了三阵，

ꑣꊰꇁꅱꀕ？铠甲肯落吗？

ꑣꊰꇁꂸꅲ。铠甲不肯落。

ꍜꇰꀉꇐꑌ，支格阿龙啊，

ꁱꅰꐎꒃꆦ，用白阉羊祭。

ꍫꀕꇖꏢꏻ，砍来四青枝，

ꃄꇖꎏꇬꍣ，插在四方位，

ꎸꃚꉘꁇꁉ，祭品热腾腾，

ꁮꌦꇖꇱꃬ，抓四把羊血，

ꃄꇖꎏꇬꁊ，撒在四方位，

ꁮꌦꉐꌦꌵ。羊血似雨滴。

ꍜꇰꀉꇐꑌ，支格阿龙啊，

ꌦꑣꌊꑣꆹ，神铠神甲啊，

ꑣꐧꆎꋍꋇ，这套中铠甲，

ꀉꇐꑣꉫꀕ？属于阿龙吗？

ꀉꇐꑣꉬꆏ，若是阿龙铠，

ꊰꇁꑣꊰꇁ，落下快落下，

ꍜꇰꀉꇐꑌ，支格阿龙啊，

ꏂꏾꍔꄉꈈ，展开披毡接，

ꆞꏾꍔꄉꈈ。展开裤脚接。

ꑣꐧꑣꏂꑌ，中套黄铠甲，

ꁍꀕꏃꇇꇤ，抖动了七阵，

ꑣꊰꇁꅱꀕ？铠甲肯落吗？

ꑣꊰꇁꂸꅲ。铠甲不肯落。

ꍜꇰꀉꇐꑌ，支格阿龙啊，

ꃪꀮꐎꒃꆦ，白公鸡来祭。

ꍫꀕꇖꏢꏻ，砍来四青枝，

ꃄꇖꎏꇬꍣ，插在四方位，

ꎸꃚꉘꁇꁉ，祭品热腾腾，

ꃬꑐꇖꇱꍠ，拔四把鸡毛，

ꃄꇖꎏꇬꁊ，撒在四方位，

ꃬꑐꉒꐎꄓ。鸡毛似云飘。

ꍜꇰꀉꇐꑌ，支格阿龙啊，

ꌦꑣꌊꑣꆹ，神铠神甲啊，

ꑣꐧꆎꋍꋇ，这套中铠甲，

ꀉꇐꑣꉫꀕ？属于阿龙吗？

ꀉꇐꑣꉬꆏ，若是阿龙铠，

ꊰꇁꑣꊰꇁ，落下快落下，

ꍜꇰꀉꇐꑌ，支格阿龙啊，

ꏂꏾꍔꄉꈈ，展开披毡接，

ꆞꏾꍔꄉꈈ，展开裤脚接，

ꑣꐧꑣꏂꑌ，中套黄铠甲，

ꁍꀕꈬꇇꇤ，抖动了九阵，

ꑣꊰꇁꅱꀕ？铠甲肯落吗？

ꑣꊰꇁꂸꅲ。铠甲不肯落。

ꍜꇰꀉꇐꑌ，支格阿龙啊，

ꑣꐧꆎꋍꋇ，这套中铠甲，

ꃄꈌꀕꊂꏭ，北方这地方，

ꌦꌋꑣꉫꀕ?有神铠甲吗？

ꌦꌋꑣꉬꆏ，若有神铠甲，

ꌦꑣꌦꅍꍯ，神铠归神处，

ꌋꑣꌋꅍꐰ，仙铠归仙处，

ꑣꐧꑣꏂꑌ，中套黄铠甲，

ꁍꀕꃰꃅꄓ，抖动着升起，

ꋌꄓꃄꈌꃹ。飞去了北方。

ꍜꇰꀉꇐꑌ，支格阿龙啊，

ꌦꑣꌊꑣꆹ，神铠神甲啊，

ꑣꂪꆎꋍꋇ，这套小铠甲，

ꀉꇐꑣꉫꀕ？属于阿龙吗？

ꀉꇐꑣꉬꆏ，若是阿龙铠，

ꊰꇁꑣꊰꇁ。落下铠落下。

ꍜꇰꀉꇐꑌ，支格阿龙啊，

ꏂꏾꍔꄉꈈ，展开披毡接，

ꆞꏾꍔꄉꈈ，展开裤脚接。

ꑣꆈꃴꏂꑌ，这套铠甲啊，

ꁍꀕꋍꇅꇤ，抖动了一阵，

ꑣꊰꇁꅱꀕ？铠甲肯落吗？

ꑣꊰꇁꂸꅲ。铠甲不肯落。

ꍜꇰꀉꇐꑌ，支格阿龙啊，

ꇌꎶꐎꒃꆦ，用白阉牛祭。

ꍫꀕꇖꏢꏻ，砍来四青枝，

ꃄꇖꎏꇬꍣ，插在四方位，

ꎸꃚꉘꁇꁉ，祭品热腾腾，

ꇌꌦꇖꇱꃬ，抓四把牛血，

ꃄꇖꎏꇬꁊ，撒在四方位，

ꇌꌦꉐꌦꌵ。牛血似雨滴。

ꍜꇰꀉꇐꑌ，支格阿龙啊，

ꌦꑣꌊꑣꆹ，神铠神甲啊，

ꑣꂪꆎꋍꋇ，这套小铠甲，

ꀉꇐꑣꉫꀕ？属于阿龙吗？

ꀉꇐꑣꉬꆏ，若是阿龙铠，

ꊰꇁꑣꊰꇁ。落下快落下。

ꍜꇰꀉꇐꑌ，支格阿龙啊，

ꏂꏾꍔꄉꈈ，展开披毡接，

ꆞꏾꍔꄉꈈ，展开裤脚接。

ꑣꆈꃴꏂꑌ，这套铠甲啊，

ꁍꀕꌕꇇꇤ，投动了三阵，

ꑣꊰꇁꅱꀕ？铠甲肯落吗？

ꑣꊰꇁꂸꅲ。铠甲不肯落。

ꍜꇰꀉꇐꑌ，支格阿龙啊，

ꁮꅰꐎꒃꆦ，用白阉羊祭。

ꍫꀕꇖꏢꏻ，砍来四青枝，

ꃄꇖꎏꇬꍣ，插在四方位，

ꎸꃚꉘꁇꁉ，祭品热腾腾，

ꁮꌦꇖꇱꃬ，抓四把羊血，

ꃄꇖꎏꇬꁊ，撒在四方位，

ꁮꌦꉐꌦꌵ。羊血似雨滴。

ꍜꇰꀉꇐꑌ，支格阿龙啊，

ꌦꑣꌊꑣꆹ，神铠神甲啊，

ꑣꂪꆏꋋꋇ，这套小铠甲，

ꀉꇐꑣꉫꀕ？属于阿龙吗？

ꀉꇐꑣꉫꆏ，若是阿龙铠，

ꊰꇁꑣꊰꇁ。落下快落下。

ꍜꇰꀉꇐꑌ？支格阿龙啊，

ꏂꏾꍔꄉꈈ，展开披毡接，

ꆞꏾꍔꄉꈈ，展开裤脚接。

ꑣꆈꃴꏂꑌ，这套神铠甲，

ꁍꀕꏃꇇꇤ，抖动了七阵，

ꑣꊰꇁꅱꀕ？铠甲肯落吗？

ꑣꊰꇁꂸꅲ。铠甲不肯落。

ꍜꇰꀉꇐꑌ，支格阿龙啊，

ꃪꀮꐎꒃꆦ，白公鸡来祭。

ꍫꀕꇖꏢꏻ，砍来四青枝，

ꃄꇖꎏꇬꍣ，插在四方位，

ꎸꃚꉘꁇꁉ，祭品热腾腾，

ꃬꑐꇖꇱꍠ，拔四把鸡毛，

ꃄꇖꎏꇬꁊ，撒在四方位，

ꃬꑐꉒꐎꄓ。鸡毛似云飘。

ꍜꇰꀉꇐꑌ，支格阿龙啊，

ꌦꑣꌊꑣꆹ，神铠神甲啊，

ꑣꂪꆏꋋꋇ，这套小铠甲，

ꀉꇐꑣꉫꀕ？属于阿龙吗？

ꀉꇐꑣꉬꆏ，若是阿龙铠，

ꊰꇁꑣꊰꇁ。落下快落下。

ꍜꇰꀉꇐꑌ，支格阿龙啊，

ꏂꏾꍔꄉꈈ，展开披毡接，

ꆞꏾꍔꄉꈈ，展开裤脚接。

ꑣꆈꃴꏂꑌ，这套神铠甲，

ꁍꀕꈬꇇꇤ，抖动了九阵，

ꑣꊰꇁꅱꀕ？铠甲肯落吗？

ꑣꊰꇁꅲꃲ。铠甲已肯落。

ꑣꃀꃴꏂꑌ，这套黑铠甲，

ꇖꇁꑣꇖꇁ，忽然掉地下，

ꑣꇖꇣꍠꀕ，掉下吱吱响，

ꄓꇁꑣꄓꇁ，铠甲从升地，

ꑣꄓꉘꉙꄓ，铠甲旋即起，

ꀉꇐꂣꈐꃹ。落在阿龙怀。

ꑣꆈꃴꏂꑌ，这套神铠甲，

ꎍꆏꇓꋍꁨ，放时如垒石，

ꈚꆏꉻꋍꏮ，穿时如城墙，

ꌌꆏꇇꋍꊭ。拿时如拳头。

ꍜꇰꀉꇐꑌ，支格阿龙啊，

ꌌꇁꌌꇁꃅ，拿着又拿着，

ꌌꇁꑱꈐꑟ，拿回到家中。

ꑳꉎꁌꌺꀀ，屋上住蒲惹，

ꁌꌺꈬꁯꀀ，蒲惹有九户，

ꁌꌺꈬꁯꌦ；九户皆灭绝；

ꑳꐮꀠꌺꀀ，屋下住巴惹，

ꀠꌺꏃꁯꀀ，巴惹有七户，

ꀠꌺꏃꁯꌦ；七户皆灭绝；

ꐷꈭꈌꃅꀀ，院坝住猎狗，

ꈌꃅꉬꂷꀀ，猎狗有五只，

ꈌꃅꉬꂷꌦ。五只皆灭绝。

ꑣꆈꃴꏂꑌ，这套铠甲啊，

ꌠꈚꌠꂸꋽ，你穿也不美，

ꀂꈚꀂꂸꋽ，他穿也不美，

ꀉꇐꈚꆏꋽ，阿龙穿就美，

ꋽꇕꋽꇵꀕ，穿上很合身，

ꉦꇕꉥꑣꀕ。穿上很稳重。

ꍜꇰꀉꇐꑌ，支格阿龙啊，

ꌦꉹꌋꉹꌊ，拿着神弯弓，

ꋌꌊꉧꑳꀕ；拿着挺神气；

ꌦꉈꌋꉈꌊ，拿着神箭条，

ꋌꌊꊎꉻꀕ；拿着挺神气；

ꌦꑣꌊꑣꈚ，穿上神铠甲，

ꋌꈚꍧꇓꀮ。漂亮又合身。

ꍜꇰꀉꇐꑌ，支格阿龙啊，

ꇈꈬꇉꃪꏭ，行走在深山，

ꂸꋒꇏꆹꋒ，遇得真奇妙，

ꇈꈬꍀꌺꋒ，遇上深山豹，

ꍀꑆꋍꁱꐒ。剥下豹皮来。

ꇉꅶꈬꊂꏭ，行走在深谷，

ꂸꋒꇏꆹꋒ，遇得真奇妙，

ꇉꅶꊈꆈꋒ，遇上深谷熊，

ꊈꑆꋍꁱꐒ。剥下熊皮来。

ꌩꑭꈬꊂꏭ，行走在森林，

ꂸꋒꇏꆹꋒ，遇得真奇妙，

ꌩꑭꑙꌺꋒ，遇到灵巧猴，

ꑙꑆꋍꁱꐒ。剥下猴皮来。

ꍜꇰꀉꇐꑌ，支格阿龙啊，

ꈬꉆꈭꏂꑆ，各种野兽皮，

ꈬꉙꈬꃪꑆ，各种飞禽皮，

ꏓꇁꏓꇁꃅ，收集又收集，

ꌊꇁꃦꃅꊨ。用来做衣服。

ꆿꑆꅪꁧꃅ，虎皮做面子，

ꍀꑆꂃꇇꃅ，豹皮作前襟，

ꊈꑆꀃꃀꃅ，熊皮做前胸，

ꐔꑆꇇꈌꃅ，麂皮做袖子，

ꉐꑆꏍꀑꃅ，锦鸡皮连接，

ꎼꑆꏣꌻꈻ，野鸡皮镶嵌，

ꑙꑆꆽꀸꃅ，猴皮做领衬，

ꎴꑆꆹꈇꃅ，獭皮做领口，

ꉌꑆꌌꌺꊐ，鼠皮做补块。

ꃦꃅꏁꁱꀕ，衣服真鲜艳，

ꈚꎔꏁꍅꀕ，衣裳真亮丽，

ꈚꑌꊷꆣꀕ，穿上暖洋洋，

ꂸꈚꊷꆣꀕ。不穿暖洋洋。

ꀑꐎꋌꂿꆹ，老人见了它，

ꈁꃅꈀꀧꉛ，张口又结舌，

ꀐꆈꋌꂿꆹ，青年见了它，

ꄸꃅꄷꉘꊐ。羡慕又嫉妒。

ꍜꇰꀉꇐꑌ，支格阿龙啊，

ꒆꇊꋋꄮꆏ，长到这时候，

ꋌꏮꋍꇴꉜ，看自己形象，

ꋍꇴꋌꆹꎴ；修长的身材，

ꋌꏮꋌꂪꉜ，看自己长相，

ꋍꂪꋌꃼꎔ；长得挺英俊，

ꋌꏮꋍꈯꉜ，看自己身体，

ꋍꈯꋌꇭꉻ。魁梧又高大。

ꍜꇰꀉꇐꑌ，支格阿龙啊，

ꏼꄵꇇꆹꈯ，弓箭搭肩上，

ꏼꏂꇖꈭꀕ；弓声响悠扬，

ꇇꆹꁻꀱꄡ，手戴护肘套，

ꇇꆹꀨꈩꀕ；胳膊很有力，

ꉈꈻꌀꂷꍣ，抽箭插发髻，

ꌀꂷꀮꇗꀕ。发髻很结实。

ꍜꇰꀉꇐꑌ，支格阿龙啊，

ꐛꆹꊿꃅꐙ，长相似人类，

ꇴꆹꆿꃅꇴ，发声似虎吼，

ꁮꆹꍀꃅꁮ，脚掌像豹爪。

ꈌꈩꉐꈧꆹ，弄舌耍嘴皮，

ꅔꐍꏰꌺꌡ；灵巧如云雀。

ꑭꈧꇇꈩꆹ，使用手脚时，

ꉛꇌꀉꆈꌡ；胜过小熊猫。

ꃼꈩꅐꈧꆹ，展翅飞翔时，

ꆪꍝꅐꅪꌡ；像天上鹞鹰。

ꑌꆏꀉꍸꒊ，坐时似猫静，

ꄓꆏꆿꃀꒊ；动则如虎威。

ꇙꆏꁵꄿꉺ，卷曲箭杆粗，

ꁉꆏꈜꐎꎳ，舒展比路长，

ꃄꇖꄹꀕꏣ；四方都能连。

ꏓꆏꋍꇵꊫ，收时一巴掌，

ꀖꆏꇌꋍꑐ；放时数无穷；

ꆗꆏꃅꈌꆗ，行走在东方，

ꁤꆏꃅꃴꁤ。名声震西方。

ꄓꃅꄓꇬꆹ，起身行走时，

ꃪꃹꃪꄩꄓ，始于悬崖边，

ꇓꂃꌟꃅꄓ；犹如滚石起；

ꌿꃴꌿꑭꏭ，始于杉林边，

ꊴꐷꌟꃅꄓ；犹如鹿子起；

ꑌꆏꊿꃅꑌ，坐时像人样，

ꈹꆏꆿꃅꄚ。追赶似虎袭。

ꀉꇐꆏꁮꀕ，阿龙很聪慧，

ꀉꇐꃅꇗꀕ，阿龙很出众，

ꀉꇐꋩꇖꀕ，阿龙很利索，

ꀉꇐꃅꆠꀕ，阿龙着装美，

ꀉꇐꊏꐆꀕ，阿龙身体壮，

ꀉꇐꄚꉻꀕ。阿龙声似钟。

ꍜꇰꀉꇐꑌ，支格阿龙啊，

ꆿꃅꀋꐦꏭ，拉木阿觉边，

ꂸꋩꃅꌔꉻ，三类不骑马，

ꆿꅪꋌꒃꋩ；老虎当马骑；

ꁮꇓꌿꆊꏭ，补尔杉林边，

ꂸꂿꑛꌕꆺ，三种不耕牛，

ꑛꅪꋌꒃꂿ；红牛捉来耕；

ꌿꉘꈬꑎꏭ，杉树丛林边，

ꂸꈚꃦꌕꈬ，三件不穿衣，

ꌩꂱꋌꒃꈚ；树笞做衣穿；

ꌩꑭꆸꈈꏭ，树林周围边，

ꂸꁨꃪꌕꉻ，三种不养鸡，

ꐰꃅꋌꒃꁨ；鹦鹉捉来养；

ꄄꁁꎿꆈꏭ，滇帕深水里，

ꂸꋠꋚꌕꆺ，三种不吃粮，

ꅋꏂꋌꒃꋠ；毒草抓来吃；

ꍜꇰꀉꇐꑌ，支格阿龙啊，

ꀑꀋꈨꁌꀘ，先念白昼经，

ꈧꁌꀘꆳꀕ，经声传远方，

ꊁꀋꌋꇴꄏ，后念夜晚经，

ꌋꇴꄎꌬꀕ；经声响清脆，

ꈪꀋꑌꐊꀕ，诵经显神灵，

ꑌꐊꀃꑴꂄ。安抚主人家。

ꍜꇰꀉꇐꑌ，支格阿龙啊，

ꑭꆹꄎꈭꌺ，粗壮的双足，

ꇓꄔꑌꐘꌺ；踩石石必碎，

ꆧꁨꄎꋩꌺ，粗壮的胳膊，

ꄆꌤꀂꏾꐑ；杵子剃头发；

ꌳꈄꀁꇬꑌ，英雄坐家里，

ꆧꁨꐚꅍꏍ；胳膊威慑敌，

ꅐꄚꆏꃅꇴ，展翅就雷鸣，

ꑓꋏꆏꉐꐙ。眨眼就下雨。

ꀉꇐꑠꂷꑌ，阿龙啊阿龙，

ꋌꄿꇈꉈꆏ，自从成人后，

ꌩꇨꁦꀑꋦ，如山巅巨树，

ꆳꇁꉐꇨꎟ，饱经了风霜，

ꈁꋦꇦꑐꀕ；长得很茂盛。

ꇓꇨꒉꋮꋦ，如河边卵石，

ꒉꇁꉐꇨꄡ，尝尽了风浪，

ꈀꋦꌅꊈꀕ。长得很坚硬。

ꉒꐎꁧꑎꏣ，白雾绕山头，

ꉒꏂꑐꇁꀕ，黄雾升袅袅，

ꉒꐎꊱꆺꀕ，白雾齐整整，

ꁧꇁꇈꈌꏣ，缠绕山谷间，

ꒊꊝꐍꎭꀕ，瀑布白晃晃，

ꁦꇁꇉꉱꑷ。覆盖山谷间。

ꍜꇰꀉꇐꑌ，支格阿龙啊，

ꀀꑌꈯꇬꀀ，住在中心地，

ꄓꑌꈯꇬꄓ。称雄中心地。

ꍜꇰꀉꇐꑌ，支格阿龙啊，

ꁧꎔꆾꃴꊿ，住在美山下，

ꄵꇓꁦꃶꊿ；土尔山下人。

ꐦꎔꆻꄧꊿ，住在美坝上，

ꀋꈚꅔꄧꊿ；阿嘎坝上人；

ꒉꎔꁦꀕꊿ，住在美河边，

ꄄꁁꎿꃀꊿ。滇帕海边人。

ꍜꇰꀉꇐꑌ，支格阿龙啊，

ꌺꃈꌟꃅꐥ，男儿在他乡，

ꌺꃈꊤꀕꑌ，男儿孤独坐，

ꌺꃈꇳꄲꀕ；男儿很寂寞。

ꍜꇰꀉꇐꑌ，支格阿龙啊，

ꅩꌺꌞꃅꐥ，女儿在异乡，

ꅩꌺꄜꀕꉆ，女儿孤独站，

ꅩꌺꉗꄸꀕ。女儿心忧伤。

ꍜꇰꀉꇐꑌ，支格阿龙啊，

ꐥꌠꐥꌒꇖ，人间想幸福，

ꌒꇖꌒꁵꂯ；就要给幸福。

ꐥꌠꋠꂊꇖ，人间想吃饱，

ꂊꇖꂊꁳꂯ；就要给足食。

ꐥꌠꈚꊸꇖ，人间想穿暖，

ꊸꇖꊸꁳꂯ。就要给足衣。

ꍜꇰꀉꇐꑌ，支格阿龙啊，

ꂣꌠꋌꍜꑳ，教愚变聪明，

ꎭꌠꋌꍜꈚ，助穷变富裕。

ꋌꍞꇁꌠꈄ，靠他显勇敢，

ꋌꐊꇁꌠꌒ。跟他得幸福。

ꍜꇰꀉꇐꑌ，支格阿龙啊，

ꋍꏯꉪꇈꑌ，想来又思去，

ꉢꑞꑠꂷꑌ，阿龙啊阿龙，

ꃅꐎꀿꃀꌺ，上天的儿子，

ꃅꑆꃅꍆꃺ；星云作兄长；

ꊖꆈꃀꀕꌺ，大地的儿子，

ꊖꐎꊕꆈꃺ。沃土作兄长。

ꀉꇐꑠꂷꑌ，阿龙啊阿龙，

ꊯꊪꀊꌺꇸ，簸箕选多次，

ꅧꌠꋋꂷꐊ；选出就是他；

ꊰꑋꀉꏢꀕ，筛子筛多次，

ꌤꌠꋋꂷꐊ；筛出就是他。

ꊯꌕꀊꈪꅓ，席子揉多次，

ꁱꂷꌕꇱꅐ，现无数花纹，

ꋍꁯꄅꀋꁆ，与大众不同，

ꑷꏣꀋꑟ。同类不可比。

四、ꇖꀉꇐꈨꆪꁻ，四阿龙射日月

ꍜꇰꀉꇐꑌ，支格阿龙啊，

ꌳꈄꂓꋦꄮ，英雄名扬时，

ꀊꑿꌺꐊꃀ，阿优惹曲莫，

ꀑꆹꏂꀑꅑ，头部像蛇头，

ꇴꆹꉆꇴꋦ，模样像野兽，

ꆂꒉꁧꊂꑌ，坐在江河边，

ꊫꍫꊫꊂꀀ，住在沼泽边，

ꃼꀊꉇꌬꎟ，左边接嘿惹，

ꑴꀊꆨꁧꊪ，右边邻勒波。

ꈧꌺꈬꊯꈬ，太阳九十九，

ꆪꌺꉆꊰꉆ，月亮八十八，

ꏸꌺꏃꊰꏁ。星星七十七，

ꈨꑌꆏꃄꈯ，日多则天干，

ꆪꑌꆏꊸꀕ，月多则暖和，

ꏸꑌꆏꃅꃴ。星多则天蓝。

ꈧꅐꏮꇖꀕ，日出团团转，

ꆪꅐꏮꉘꀕ，月出圆圆转，

ꏸꅐꅩꌦꀕ。星出微微亮，

ꈨꄚꆏꄚꇴ，烈日在此照，

ꆪꄚꆏꄚꎸ，明月在此显，

ꏸꄚꆏꄚꋦ。群星在此闪。

ꈧꅐꁨꇁꇰ，东方日渐出，

ꆂꒉꁦꊂꄓ，江河边上升，

ꂿꃋꊰꃹꉱ，忽然天落幕，

ꃅꃞꃅꆧꆏ，上空变狭窄，

ꂿꃋꄙꁱꋠ。宇宙黑漆漆。

ꌦꌺꄂꅪꑌ，斯惹狄尼啊，

ꂸꊪꇏꆹꊪ，选派好差使，

ꀋꈨꑴꈓꊪ，派阿格叶苦，

ꈧꇴꆪꄀꎻ。喊出日月来。

ꀋꈨꑴꈓꑌ，阿格叶苦啊，

ꈧꇴꆹꂿꄷ，要去喊太阳，

ꆪꇴꆹꂿꄷ。要去喊月亮。

ꆹꇈꆹꇈꃅ，走着又走着，

ꄵꇓꁦꀑꉆ。站在土尔山，

ꐎꄻꐍꇁꄵ，锻银用银锤，

ꏂꄻꏁꇁꄵ，锻金用金锤，

ꐎꑳꏂꑳꋉ，建造金银房。

ꇌꎶꐎꒃꆦ，用白阉牛祭，

ꇌꀑꇌꏢꀖ，取出牛内脏，

ꑳꇖꎏꇬꅞ。放在屋四角，

ꈬꑍꇴꃅꈊ，九天喊到晚，

ꈨꌺꃘꅐꇁ，喊出六个太阳来；

ꈬꉖꇴꃅꄜ，九夜喊到亮，

ꆪꌺꏃꅐꇁ。。喊出七个月亮来。

ꀋꈨꑴꈓꑌ，阿格叶苦啊，

ꆹꇈꆹꇈꃅ，走着又走着，

ꄵꇓꁧꐧꉆ，到土尔山腰，

ꐯꄻꐯꇁꄵ，打铜用铜锤，

ꉾꄻꉾꇁꄵ，打铁用铁锤，

ꐯꑳꉾꑳꋉ，建造铜铁房。

ꁮꅰꐎꒃꆦ，用白阉羊祭，

ꑿꀑꑾꏢꀖ，取出羊内脏，

ꑳꇖꎏꇬꅞ，放在屋四角，

ꏃꑍꇴꃅꈊ，七天喊到晚，

ꎮꑐꏃꅐꇁ，喊出北斗星；

ꏃꉔꇴꃅꄜ，七夜喊到亮，

ꍶꈓꃘꅐꇁ。喊出北极星。

ꀋꈨꑴꈓꑌ，阿格叶苦啊，

ꆹꇈꆹꇈꃅ，走着又走着，

ꄵꇓꁦꑭꉆ，到土尔山脚，

ꌩꄻꌩꇁꄵ，修木用木锤，

ꂷꄻꂷꇁꄵ，编竹用竹锤，

ꌩꑳꂷꑳꋉ，建造竹木房。

ꃬꎶꐎꒃꆦ，白公鸡来祭，

ꎸꃚꇖꋓꌊ，烧四盘鸡肉，

ꑳꇖꎏꇬꅞ，放在屋四角，

ꌕꑍꇴꃅꈊ，三天喊到晚，

ꌕꄡꏸꅐꇁ；喊出三排星；

ꌕꉖꇴꃅꄜ，三夜喊到亮，

ꑛꅪꇖꅐꇁ。喊出四仙星，

ꃅꃴꏸꋦꄖ，星斗数不尽。

ꋌꊂꇀꈭꐨ，自从这以后，

ꑍꆏꈨꃘꅐ，日出六太阳，

ꌊꆏꆪꏃꅐ。夜出七月亮。

ꈨꃘꆪꏃꅐ，六日七月出，

ꏃꃅꉬꐮꏮ，下面大地上，

ꌩꉬꆺꀕꈤ，树木被晒枯，

ꉘꌩꅘꄂꋒ；只剩火斯蕨枝树，

ꒉꉬꆺꀕꈤ，江水被晒干，

ꀋꂿꎿꄜꋒ；只剩阿莫湖。

ꉘꌩꅘꄂꑌ，火斯蕨枝啊，

ꀋꂿꎿꑳꁨ，阿莫来保护，

ꋌꋦꃴꇉꀕ；长得绿油油，

ꀋꂿꎿꄜꑌ，阿莫能剩下，

ꉘꌩꅘꑳꁨ，火斯来保护，

ꋌꀀꉘꁇꁉ。。湖水起白雾。

ꁬꉬꆺꀕꈤ，草类被晒干，

ꀿꏾꐎꁧꋒ，只剩帕切草，

ꋌꇁꁦꀕꅿ，长在湖边上，

ꋋꅿꀫꈩꀕ。。长得很茂密。

ꇤꉬꆺꀕꈤ，庄稼被晒干，

ꃆꇖꄁꁧꋒ，剩棵亚麻种，

ꋌꇁꄚꈿꋦ，与此同生长，

ꋌꋦꉘꇕꀕ；长得很茂盛。

ꑛꉬꆺꀕꈤ，家畜被晒死，

ꀉꑐꇇꅃꋒ，只剩白脚猫，

ꋌꇁꄚꈿꐥ，与此同生活，

ꋌꐥꅻꁬꀕ；长得很精神。

ꉆꉬꆺꀕꈤ，野兽被晒死，

ꇍꀮꍪꐎꋒ，只剩灰公獐，

ꋌꇁꄚꌋꇈ，与此同守护，

ꋌꌋꁤꇉꀕ。守护亮堂堂。

ꊿꐥꇫꐥꌠ，活着的人们，

ꐥꃅꐤꄸꎭ，活得很艰难，

ꐥꇈꃅꀋꈊ，难熬到傍晚，

ꀀꇈꃅꀋꄜ，难眠到天亮，

ꐥꇈꈭꀋꅐ，难活到来年，

ꋍꐦꉌꂵꏡ。心灰又意冷。

ꍜꇰꀉꇐꑌ，支格阿龙啊，

ꑓꅑꆹꋋꂿ，有眼能见到，

ꅺꅑꆹꋋꈨ，有耳能听到，

ꈨꁻꆹꂿꄷ，要去射太阳，

ꆪꁻꆹꂿꄷ。要去射月亮。

ꍜꇰꀉꇐꑌ，支格阿龙啊，

ꌦꉹꌋꉹꌊ，扳着神弯弓，

ꌦꉈꌊꉈꌊ，搭着神箭条，

ꌦꑣꌊꑣꃢ，穿着神铠甲，

ꂴꆽꋍꑍꁻ，先去射一天，

ꅙꋦꈬꑎꆏ，蕨芨草坡上，

ꅙꄩꉆꄉꁻ，站在蕨上射，

ꈨꁻꈨꌸꀕ？射日中日吗？

ꈨꁻꈨꂸꌸ，射日不中日，

ꆪꁻꆪꌸꀕ？射月中月吗？

ꆪꁻꆪꂸꌸ，射月不中月，

ꍜꇰꀉꇐꑌ，支格阿龙啊，

ꇨꇅꃃꑣꀕ，急得怒冲冲，

ꇇꎇꅙꀑꐔ，伸手折蕨草，

ꅙꋦꃄꏪꀕ，蕨芨遍地长，

ꅙꒆꀑꇵꀕ，蕨芨垂着头，

ꀊꆨꀑꇵꀕ，昔日垂着头，

ꀋꃅꀑꇵꀕ。今日垂着头。

ꍜꇰꀉꇐꑌ，支格阿龙啊，

ꊂꇁꋍꑍꁻ，后来射一天，

ꌧꊈꈬꊂꆏ，野葡萄上射，

ꌧꊈꄩꄉꁻ，站在藤上射，

ꈨꁻꈨꌸꀕ？射日中日吗？

ꈨꁻꈨꂸꌸ，射日不中日，

ꆪꁻꆪꌸꀕ？射月中月吗？

ꆪꁻꆪꂸꌸ。射月不中月。

ꍜꇰꀉꇐꑌ，支格阿龙啊，

ꇨꇅꃃꋦꀕ，气得怒冲冲，

ꑭꎅꌧꀑꑃ，伸脚蹬葡萄，

ꌧꊈꃄꏪꀕ，葡萄遍地长，

ꀑꒆꂪꇱꋦ，头往根处长，

ꀊꆨꂪꇱꋦ，昔日往根长，

ꀋꃅꂪꇱꋦ。今日往根长。

ꍜꇰꀉꇐꑌ，支格阿龙啊，

ꊂꇁꋍꑍꁻ，后来射一天，

ꄵꇓꒈꇤꏭ，土尔水沟边，

ꏸꌩꈬꊂꆏ，基斯树丛林，

ꏸꄩꉆꄉꁻ，站在树顶射，

ꈨꁻꈨꌸꀕ？射日中日吗？

ꈨꁻꈨꂸꌸ，射日不中日，

ꂷꁻꆪꌸꀕ？射月中月吗？

ꆪꁻꆪꂸꌸ。射月不中月。

ꍜꇰꀉꇐꑌ，支格阿龙啊，

ꇨꇅꃃꎓꀕ，气得怒冲冠，

ꇇꎇꌩꀑꉧ，伸手扳树梢，

ꏸꋦꃄꏪꀕ，基斯遍地生，

ꏸꒆꄾꏪꀕ，基斯长不高，

ꀊꆨꄿꏪꀕ，昔日长不高，

ꀋꃅꄾꏪꀕ。今日长不高。

ꍜꇰꀉꇐꑌ，支格阿龙啊，

ꊂꇁꋍꑍꁻ，后来射一天，

ꄵꇓꁧꑭꏭ，土尔山脚下，

ꂷꋦꈬꊂꆏ，竹海密林里。

ꂷꄩꉆꄉꁻ，站在竹上射，

ꈨꁻꈨꌸꀕ？射日中日吗？

ꈨꁻꈨꂸꌸ，射日不中日，

ꆪꁻꆪꌸꀕ？射月中月吗？

ꆪꁻꆪꂸꌸ。射月不中月。

ꍜꇰꀉꇐꑌ，支格阿龙啊，

ꇨꇅꃃꊰꀕ，气得生怨恨，

ꇇꎇꂷꀑꈎ，伸手扳竹梢，

ꂷꋦꃄꏪꀕ，竹子遍地长，

ꂷꀑꌕꊌꈪ，竹梢三道弯，

ꀊꆨꌕꊌꈪ，昔日三道弯，

ꀋꃅꌕꊌꈪ。今日三道弯。

ꍜꇰꀉꇐꑌ，支格阿龙啊，

ꊂꇁꋍꑍꁻ，后来射一天，

ꄵꇓꁧꐧꏭ，土尔山腰上，

ꄮꋦꈬꊂꆏ，松树丛林里。

ꄮꄩꉆꄉꁻ，站在松上射，

ꈨꁻꈨꌸꀕ？射日中日吗？

ꈨꁻꈨꂸꌸ，射日不中日，

ꆪꁻꆪꌸꀕ？射月中月吗？

ꆪꁻꆪꂸꌸ。射月不中月。

ꍜꇰꀉꇐꑌ，支格阿龙啊，

ꇨꇅꃃꐆꀕ，气得怒冲冲，

ꉈꈻꌨꀑꈌ，抽箭砍树梢，

ꄮꋦꃄꏪꀕ，松树遍地长，

ꄮꇽꋊꂸꅿ，砍处不生枝，

ꀊꆨꋊꂸꅿ，过去不再生，

ꀋꃅꋊꂸꅿ。今日不再生。

ꍜꇰꀉꇐꑌ，支格阿龙啊，

ꊂꇁꋍꑍꁻ，后来射一天，

ꄵꇓꁦꀑꏭ，土尔山顶上，

ꎰꂝꈫꊂꆏ，索玛树林里，

ꂝꄩꉆꄉꁻ，站在树上射，

ꈨꁻꈨꌸꀕ？射日中日吗？

ꈨꁻꈨꂸꌸ，射日不中日，

ꆪꁻꆪꌸꀕ？射月中月吗？

ꆪꁻꆪꂸꌸ。射月不中月。

ꍜꇰꀉꇐꑌ，支格阿龙啊，

ꇨꇅꃃꈯꀕ，怒发又冲冠，

ꑭꎅꌩꀑꎪ，伸脚踩树梢，

ꎰꂝꃄꏪꀕ，索玛遍地长，

ꎰꂝꒆꅉꁙ，索玛成矮树，

ꀊꆨꑌꅉꁙ，过去成矮树，

ꀋꃅꑌꅉꁙ。今日成矮树。

ꍜꇰꀉꇐꑌ，支格阿龙啊，

ꎏꁮꈁꑳꀕ，咬牙又痛恨，

ꈨꆨꀋꇷꋠ，日月遭愤恨，

ꈨꌂꇳꍠꀕ，恨日恨透顶，

ꆪꌂꉘꄷꀕ。恨月恨入骨。

ꍜꇰꀉꇐꑌ，支格阿龙啊，

ꃄꎖꆹꂿꄷ，要去量土地，

ꈌꏷꆹꂿꄷ。要去量四方，

ꃅꃴꈜꁮꀕ？上天有路吗？

ꈜꁮꈜꎷꂯ，有路去寻路，

ꂸꁮꈜꎷꂯ。无路也去找。

ꒈꀑꌕꇉꏭ，北方水源头，

ꃅꃴꈜꁮꀕ？上天有路吗？

ꃅꃴꈜꂸꁮ。上天没有路。

ꒈꂪꌕꇉꏭ，南方水流处，

ꃅꃴꈜꁮꀕ？上天有路吗？

ꃅꃴꈜꂸꁮ。上天没有路。

ꁭꅐꌕꇉꏭ，东方三面里，

ꃅꃴꈜꁮꀕ？上天有路吗？

ꃅꃴꈜꂸꁮ。上天没有路。

ꁮꐚꌕꇉꏭ，西方三面里，

ꃅꃴꈜꁮꀕ？上天有路吗？

ꃅꃴꈜꂸꁮ。上天没有路。

ꍜꇰꀉꇐꑌ，支格阿龙啊，

ꏮꇈꃅꃴꉜ，仰头望天空，

ꃅꃴꃰꇌꀕ；天空圆圆的，

ꏮꇈꃅꈋꉜ，俯瞰看大地，

ꃅꈋꃰꈭꀕ；大地圆圆的，

ꏮꇈꃅꈬꉜ，抬头望天边，

ꃅꈬꎵꑳꀕ，天边直挺挺，

ꆸꅉꎹꂸꊌ。无法找去处。

ꍜꇰꀉꇐꑌ，支格阿龙啊，

ꑗꑘꑖꇖꇁ，求啊求帮助，

ꑗꇖꇽꍤꀕ，求助心切切，

ꑗꇖꈁꁐꀕ。求助走四方。

ꑗꇖꃅꐎꋩ，求助骑白马，

ꑗꇖꇌꐎꂿ，求助犁白牛，

ꑗꇖꃦꐎꈚ，求助穿白衣，

ꁦꀑꈁꂥꑌ，坐在最高处，

ꀉꇐꑗꇖꇁ，阿龙来求助，

ꀉꇐꈨꂟꇁ。阿龙来恳求。

ꄩꆹꃅꐎꀿ，上面天为父，

ꑗꀿꐎꌀꋉ，助父插发髻，

ꁦꀑꈁꂥꑌ，坐在最高处，

ꑗꉜꈨꉚꇁ，来寻求助法，

ꑗꊨꑗꇚꇁ。来定求助术。

ꍜꇰꀉꇐꑌ，支格阿龙啊，

ꑗꇖꏂꃅꋩ，求助骑黄马，

ꑗꇖꏂꇌꂿ，求助犁黄牛，

ꑗꇖꏂꃦꈚ，求助穿黄衣，

ꇈꀑꈁꅼꉆ。站在最深谷。

ꀏꆹꊖꆈꃀ，下面地为母，

ꑗꃀꏁꄟꅑ，助母戴黄帕，

ꇈꀑꈁꅼꉆ，站在最深处，

ꑗꆫꈨꆫꇁ，来寻求助法，

ꈨꊨꈨꇚꇁ。来定求助术。

ꍜꇰꀉꇐꑌ，支格阿龙啊，

ꑗꇖꇳꍠꀕ，求助声声唤，

ꑗꇖꉘꄷꀕ。求助心急切。

ꍜꇰꀉꇐꑌ，支格阿龙啊，

ꑗꇖꈨꈎꄯ，求助误了年，

ꑗꇖꆪꈐꏽ，求助误了月。

ꃅꇗꃅꌋꆹ，要说天地神，

ꒉꌠꎹꀕꒉ，就属圣舍大，

ꎹꀕꀉꁌꒉ，圣舍阿普大，

ꎹꀕꅺꁧꇰ，圣舍见闻广。

ꀉꇐꑗꇖꀕ，阿龙求助急，

ꀉꇐꑖꈠꀕ。阿龙求助真。

ꎹꀕꀉꁌꑌ，圣舍阿普啊，

ꋌꈨꇖꃱꆏ，听了这些后，

ꅳꀧꑍꃺꑌ，耳朵两兄弟，

ꍝꇁꅱꅉꃅ；竖起耳朵听，

ꑓꋪꑍꃺꑌ，眼睛两兄弟，

ꍔꇁꉜꅉꃅ；睁开眼睛看，

ꑭꇇꑍꃺꑌ，手脚两兄弟，

ꄓꇁꉆꅉꃅ。起身又站立。

ꎹꀕꋦꅉꇬ，圣舍居住地，

ꌦꈌꌊꈌꃮ，神狗仙狗吠，

ꌦꃬꌊꃬꇴ，神鸡仙鸡叫，

ꌦꃅꌊꃅꀆ。神马仙马鸣。

ꎹꀕꀉꁌꑌ，圣舍阿普啊，

ꀑꆹꐍꇬꀕ，银色白头发，

ꐎꈄꃮꌠꌡ；就像嵌银丝，

ꑓꊏꃰꁦꐎ，睫毛白如雪。

ꀑꑐꐍꇬꀕ，头发白生生，

ꈬꆹꈫꐑꐛ，九丈九尺长。

ꂴꊨꐍꃰꀕ，胡须白晃晃，

ꏃꆹꏃꐑꐛ，七丈七尺长。

ꀑꑊꒈꆭꀕ，张嘴笑吟吟，

ꂸꌒꀕꉨꀕ，显得很幸福。

ꑓꂷꍓꇌꈨ，眼珠大又亮，

ꀋꂿꀕꉨꀕ，万物皆明察。

ꅳꀧꃪꑳꐛ，耳朵似岩屋，

ꀋꈨꀕꉨꀕ。万事皆知晓。

ꎹꀕꀉꁌꑌ，圣舍阿普啊，

ꉒꐎꎆꃅꅸ，白云当羊赶，

ꉒꆈꃦꃅꈚ，黑云当衣穿，

ꉒꎸꉾꃅꋠ，云雾当肉吃，

ꌕꆳꃅꀕꋩ，疾风当马骑，

ꉐꌩꎧꃅꅝ。暴雨当酒喝。

ꎹꀕꀉꁌꑌ，圣舍阿普啊，

ꋍꑍꊰꇉꈴ，一天越十沟，

ꈁꉆꒊꌋꀕ，站立显稳重，

ꋍꑍꊰꇉꏶ，一天过十谷，

ꈁꉆꈭꇐꀕ。站立显豪气。

ꍜꇰꀉꇐꑌ，支格阿龙啊，

ꇇꑭꄁꇴꐔ，立即做礼仪，

ꎹꀕꀉꁌꅞ。跪拜阿普前。

ꀉꁌꇈꀉꁌ，阿普啊阿普，

ꑍꆏꈨꃘꅐ，日出六太阳，

ꌊꆏꆪꏃꅐ，夜出七月亮，

ꏃꃅꉬꐮꏭ，下面大地上，

ꊿꐥꇫꐥꌠ，活着的人们，

ꐥꇈꈭꂸꅐ，活得无奈何，

ꌠꌅꂇꁦꀕ，男人们悲愤，

ꌠꃀꉨꑰꀕ，女人们流泪，

ꌟꌺꀆꆽꀕ。小孩们哭泣。

ꉢꑞꑠꂷꑌ，阿龙啊阿龙，

ꈨꁻꆹꂿꄷ，要去射日去，

ꆪꁻꆹꂿꄷ，要去射月去，

ꁦꀑꈁꂨꁻ，站在高山射，

ꈨꁻꈨꌶꀕ？射日中日吗？

ꈨꁻꈨꂸꌸ，射日不中日。

ꇈꀑꈁꅼꁻ，站在深谷射，

ꆪꁻꆪꌶꀕ？射月中月吗？

ꆪꁻꆪꂸꌸ。射月不中月。

ꀉꁌꇈꀉꁌ，阿普啊阿普，

ꆏꑞꑠꂷꑌ，你这非凡人，

ꆎꐥꌦꃅꐥ，活着似神仙，

ꌦꏾꌐꁱꀕ，似神般智慧，

ꆎꐥꌋꃅꐥ，活着似仙人，

ꌋꇴꄎꌬꀕ。似仙般神气。

ꃅꌋꆹꀿꃀ，天空是父母，

ꐧꃅꆹꌺꇖ，人间是子孙，

ꃅꌋꆹꃺꃶ，天空是兄长，

ꐧꃅꆹꑌꀕ，人间是弟弟，

ꊿꐥꇫꐥꌠ，活着的人们，

ꀑꇬꃅꌋꊩ，生命要靠天，

ꁨꁦꃅꌋꎭ，兴旺也靠天，

ꆏꉜꈍꃅꂯ？你看怎么办？

ꎹꀕꀉꁌꑌ，圣舍阿普啊，

ꍜꇰꀉꇐꏭ，对支格阿龙，

ꑗꇖꑗꁳꂯ，求助要给助，

ꑗꇖꑗꊨꂯ，求助解疑难，

ꑗꇖꑗꇠꂯ。求助定技法。

ꈨꁻꆹꂯꇬ，要想去射日，

ꆪꁻꆹꂯꆏ，要想去射月，

ꃅꈯꎹꄉꁻ，找准地心射，

ꁻꆏꌸꎂꀕ。射日必射中。

ꎹꀕꀉꁌꑌ，圣舍阿普啊，

ꅇꉉꇈꊂꆏ，说完话之后，

ꋌꐰꇫꈴꁧ。隐身而去了。

ꍜꇰꀉꇐꑌ，支格阿龙啊，

ꃅꃴꃅꈋꆹ，从东西两面，

ꋌꇁꏍꄉꁻ，交叉来射箭，

ꂸꌸꇏꆹꌸ，正好射中了，

ꏨꄵꃅꈯꌸ。鸠土木古地。

ꃅꃞꃅꆧꆹ，从南北两面，

ꋌꇁꏍꄉꁻ，交叉来射箭，

ꂸꌸꇏꆹꌸ，正好射中了，

ꏨꄵꃅꈯꌸ。鸠土木古地。

ꋌꊂꇀꈭꐨ，自从那以后，

ꍜꇰꀉꇐꑌ，支格阿龙啊，

ꆹꇈꆹꇈꃅ，走着又走着，

ꏨꄵꃅꈯꑟ。到鸠土木古。

ꏨꄵꃅꈯꆏ，鸠土木古啊，

ꁦꉬꃄꏪꀕ，山峦起伏美，

ꂥꌠꋋꂷꐥ。只有这山高。

ꋌꇿꏾꌌꀕ，阿龙乐滋滋，

ꋌꒇꇖꈭꀕ。阿龙心满意。

ꏨꄵꁦꀑꆏ，鸠土山头上，

ꎺꁧꄚꋦꌠ，这里长柏树，

ꎺꑭꆹꈬꀠ，柏树长得粗，

ꎺꁧꏴꑛꀕ，柏树很笔直，

ꎺꀑꇦꑐꀕ。柏树很茂盛。

ꎺꁧꎺꀿꆹ，柏树的溯源，

ꀃꌋꏂꀊꆨ，远古的时候，

ꎺꌩꎺꂷꆹ，柏树的种子，

ꑍꋒꇖꂷꐥ。两双有四颗。

ꎺꌩꎺꂷꑌ，柏树种子啊，

ꃅꃴꀕꇬꊰ，从天上落下，

ꄂꐎꀕꇬꅞ；落在白云处；

ꄂꐎꀕꇬꊰ，从白云落下，

ꄂꆈꆧꇬꅞ；落在黑云处；

ꄂꆈꆧꇬꊰ，从黑云落下，

ꄂꏂꀕꇬꅞ；落在黄云处；

ꄂꏂꀕꇬꊰ，从黄云落下，

ꉒꈌꄜꑎꅞ；落在雾霭处；

ꉒꈌꄜꑎꊰ，从雾霭落下，

ꃆꉻꄜꑎꅞ；落在山岚处；

ꃆꉻꄜꑎꊰ，从山岚落下，

ꏨꄵꁦꀑꅞ。落在鸠土山。

ꏨꄵꁦꀑꆏ，鸠土高山上，

ꂸꊌꇏꆹꊌ，恰巧被拾得，

ꀊꉘꃮꆫꊌ。放猪娃拾得，

ꀊꉘꃮꆫꑌ，小孩放猪娃，

ꌌꇁꌌꇁꃅ，拿来又拿来，

ꌌꇁꑊꌠꀨ，拿给苏尼看，

ꑊꌺꋋꂸꌧ，苏尼不识它，

ꋌꌧꋍꋒꃅ。他识他法器。

ꌌꇁꌌꇁꃅ，拿来又拿来，

ꌌꇁꀘꌠꀨ，拿给毕摩看，

ꀗꌺꋋꂸꌧ，毕摩不识它，

ꋌꌧꋍꃺꄲ。他识他灵筒。

ꌌꇁꌌꇁꃅ，拿来又拿来，

ꌌꇁꀋꁧꀨ，拿给父亲看，

ꀋꁧꋋꂸꌧ，父亲不识它，

ꌋꁁꋠꉘꃅ，拿来试着咬，

ꋌꌧꋍꑷꇤ。他识他烟杆。

ꌌꇁꌌꇁꃅ，拿来又拿来，

ꌌꇁꀉꂿꀨ，拿给母亲看，

ꀉꂿꋋꂸꌧ，母亲不识它，

ꌌꇁꅝꉘꃅ，拿来试着喝，

ꋌꌧꋋꎭꃹ。她识她纺锤。

ꌌꇁꌌꇁꃅ，拿来又拿来，

ꌌꇁꇮꌺꀨ，拿给铁匠看，

ꇮꌺꋋꂸꌧ，铁匠不识它，

ꋌꌧꋍꎸꄂ。他识他铁磴。

ꌌꇁꌌꇁꃅ，拿来又拿来，

ꌌꇁꎃꀕꀨ，拿给百姓看，

ꎃꀕꋋꂸꌧ，百姓不识它，

ꋌꌧꋍꆫꃅ。他识他农牧。

ꌌꇁꌌꇁꃅ，拿来又拿来，

ꌌꇁꆫꌠꀨ，拿给牧人看，

ꆫꌠꄷꀑꁮ，牧人挺聪明，

ꆫꌠꄷꅺꐳ，牧人有智慧，

ꆫꌠꄷꌧꋧ，牧人见识广，

ꆫꌠꄷꉬꑸ，牧人认出它，

ꎺꌩꉬꑴꄷ，这是大柏树，

ꎺꂷꉬꑴꄷ。这是柏树子。

ꎺꌩꎺꂷꑌ，柏树的种子，

ꌌꇁꌌꇁꃅ，拿来又拿来，

ꌌꇁꑳꐮꊪ，拿来种屋下，

ꎺꊪꃅꉫꀕ？可否种柏树?

ꎺꊪꃅꂸꉬ，不宜种柏树，

ꎺꊪꃅꉬꑌ，即便宜种柏，

ꎺꅿꃅꂸꉬ。不宜长柏树。

ꑳꐮꌕꁏꏭ，在房屋下方，

ꃮꇁꃬꈴꅉ，猪鸡过路处，

ꋌꎪꌥꎼꏦ。害怕被踩踏。

ꎺꌩꎺꂷꑌ，柏树的种子，

ꌌꇁꌌꇁꃅ，拿来又拿来，

ꌌꇁꑳꉎꊪ，种在屋上方，

ꎺꊪꃅꉫꀕ？可否种柏树？

ꎺꊪꃅꂸꉬ，不宜种柏树，

ꎺꊪꃅꉬꑌ，即便宜种柏，

ꎺꅿꃅꂸꉬ。不宜长柏树。

ꑳꉎꌕꁏꏭ，在房屋上方，

ꑛꇁꑾꈴꅉ，牛羊过路处，

ꋌꎪꌥꎼꏦ。害怕被踩踏。

ꎺꌩꎺꂷꆹ，柏树的种子，

ꌌꇁꌌꇁꃅ，拿来又拿来，

ꏨꄵꁦꀑꊪ，种在鸠土山，

ꏨꄵꁦꀑꆏ，在鸠土山上，

ꎺꊪꃅꉫꀕ？可否种柏树？

ꎺꊪꃅꑌꉬ，这里宜种柏，

ꎺꅿꃅꉫꀕ？是否长柏地？

ꎺꅿꃅꑌꉬ。这里宜长柏。

ꏃꑍꀊꊯꌕ，过了十三天，

ꉜꆹꎺꉜꆹ，去看柏树去，

ꀯꃹꅳꈑꅐ；柏树绿茵茵。

ꋌꊂꇀꈭꐨ，从此这以后，

ꏃꑍꀊꊯꌕ，过了十三天，

ꉜꆹꎺꉜꆹ，又去看柏树，

ꎺꅿꃴꇉꀕ。柏树绿油油。

ꈎꇁꈭꏝꆏ，一年四季后，

ꉜꆹꎺꉜꆹ，又去看柏树，

ꎺꒆꇦꑐꀕ，柏树繁殖茂，

ꎺꏾꇪꉾꀕ。柏树枝干壮。

ꎺꌦꎺꌋꑌ，神仙柏树啊，

ꐴꅿꐴꅑꆹ，根须粗而壮，

ꇖꊰꉆꐴꅑ，四十八根须，

ꇈꈬꆿꅪꑌ，深山狮子啊，

ꇖꊯꉆꈌꀕ。四十八个窝。

ꇦꒆꇦꎑꆹ，树干很茂盛，

ꇖꊯꉆꇪꎑ，四十八枝丫，

ꃅꈯꏨꆉꑌ，天空雄鹰啊，

ꇖꊯꉆꈌꀕ。四十八个巢。

ꀠꆹꀠꇮꇬ，若要去丈量，

ꇖꊯꉆꀠꐛ；有四十八围；

ꐦꆹꐦꇮꇬ，若要去砍断，

ꇖꊯꉆꐦꐛ。有四十八节。

ꎺꌦꎺꌋꉬ，神仙柏树啊，

ꀑꆹꍆꀕꈌ，顶上住喜鹊，

ꐧꀠꀋꆳꈌ，中间住鸽子，

ꐴꑭꍀꌺꈌ，树下住豹子，

ꎺꇇꍀꌺꈩ，枝干豹子爬，

ꇬꇉꐛꑿꈌ，树心住蜜蜂，

ꎺꑭꐔꇌꀜ。树下獐鹿跳。

ꎺꐯꂷꋦꆹ，柏树下长竹，

ꂶꋦꈬꁍꋦ，竹子有九片。

ꎺꑌꂷꑲꁨ，柏树保护竹，

ꂷꀑꍑꂸꅑ，竹梢无露水。

ꂷꑌꎺꑲꁨ，竹子保护柏，

ꎺꑭꆳꂸꃹ。柏根不入风。

ꂷꑭꉑꀮꍻ，竹林锦鸡鸣，

ꎺꄩꏨꆉꃰ，柏上雄鹰飞，

ꎺꀑꏨꌺꈩ。树顶雏鹰玩。

ꍜꇰꀉꇐꑌ，支格阿龙啊，

ꆹꇈꆹꇈꃅ，走着又走着，

ꆹꇈꎺꄩꉆ，站在柏树上，

ꏼꄵꇇꆹꈯ，弯弓握在手，

ꏼꏂꇖꈭꀕ，弯弓响悠扬，

ꇇꆹꀨꈩꀕ，胳膊挺有力，

ꉈꊈꁵꄿꏡ，箭条粗又直，

ꁵꄿꆈꊉꀕ，箭条黑漆漆，

ꉈꈻꌀꂷꍣ，抽箭插发髻，

ꌀꂷꀮꇗꀕ。发髻沉甸甸。

ꍜꇰꀉꇐꑌ，支格阿龙啊，

ꂴꆽꋍꇅꁻ，先放了一箭，

ꌦꉹꉧꄉꁻ，拉起神弓射，

ꌦꉈꏦꄉꁻ，搭起神箭射，

ꉈꑌꉈꃅꆹ，箭也飞奔去，

ꇖꈭꀕꃅꆹ，悠扬婉转去，

ꅔꊂꉼꃅꆹ。响彻云霄去。

ꈨꁻꈨꌸꀕ？射日中日吗？

ꈨꁻꈨꌸꇈ。射日又中日。

ꍜꇰꀉꇐꑌ，支格阿龙啊，

ꊂꇁꋍꇅꁻ，后又射一箭，

ꌋꉹꉧꄉꁻ，拉着仙弓射，

ꌊꉈꏦꄉꁻ，搭着仙箭射，

ꉈꑌꉇꃅꆹ，箭也飞奔去，

ꁴꇖꀕꃅꆹ，直直飞奔去，

ꇉꊂꉼꃅꆹ，山谷响彻去，

ꆪꁻꆪꌸꀕ？射月中月吗？

ꆪꁻꆪꌸꇈ。射月也中月。

ꈨꁻꈧꄂꋒ，射日剩独日，

ꈧꄂꑓꐚꋒ，剩下病眼日。

ꆪꁻꆪꄂꋒ，射月剩独月，

ꆪꄂꁁꁐꋒ。剩下半残月。

ꈨꃘꆪꏃꆹ，六日七月啊，

ꍜꇰꀉꇐꁻ，支格阿龙射，

ꏃꃅꉬꐮꏭ，下面大地上，

ꇓꏪꏂꊂꍅ。压在大石下。

ꍜꇰꀉꇐꑌ，支格阿龙啊，

ꋌꇿꏾꌌꀕ，他乐不可支，

ꇇꎇꎺꀑꌎ，伸手抚柏树，

ꎺꋦꃅꏪꀕ，柏树遍地长，

ꎺꋦꈬꁍꆧ，柏树枝叶茂，

ꎺꌺꒆꏦꎃ，柏树长得直，

ꀊꆨꒆꏦꎃ，昔日长得直，

ꀋꃅꒆꏦꎃ。今日长得直。

2001年，正是互联网兴起的年代，彝-人-网团队便确立了构建彝族文化数据库的宏远目标，初心不改，坚持走下去。

【声明】本文转自公开互联网平台，并经彝族人网排版发布，旨在公益宣传彝族文化和彝区发展。文章仅代表作者观点，不代表本网完全赞同或者证明其信息真实性。文章版权归属作者和原媒体，如著作权人不愿意在本网发表或文章有问题，请联系我们进行删除或修改。特此向作者和原媒体致以敬意和感谢！　　（了解更多…）

编辑： 阿腊 发布： 阿腊 标签： 彝族英雄英雄史诗支格阿鲁彝汉对译

上一篇:孔建庵｜元阳观音山的传说（三）：老榕树...

返回顶部 ↑ 下一篇:孔建庵｜元阳观音山的传说（四）：姊妹神...

传统文化 National Culture

彝汉文对译｜彝族英雄史诗：支格阿鲁

一、ꋍꍜꇰꀉꇐꒆ，支格阿鲁诞生

二、ꑍꀉꇐꀉꂿꐞ二阿龙与母亲分离

三、ꌕꀉꇐꅿꉀꒆ，三阿龙的成长

四、ꇖꀉꇐꈨꆪꁻ，四阿龙射日月

相关内容

/ Recommendation

/ Reading list