​ꇔꇷꀉꃈ：ꑋꅐꑋꈌꁏ ꋧꃅꀀꐚꇁ

这里是彝族文化网络博物馆，海量的数据，鲜明的彝族文化特色，是向世界展示彝族文化的窗口，感谢您访问彝族 人 网站。

ꑋꈌꑭꁘꑋꆳꐊꄉꁏ，ꈨꑭꐊꄉꊸ，ꃨꎔꐊꄉꇁ；ꑋꅐꑋꈌꁏ，ꋧꃅꀀꐚꇁ，ꀀꐚꌊꄉꉘꇉꇗꂷꆏꊪꉢꊪꂅ。NiB彝族人网（彝人网）- 彝族文化网络博物馆

——ꇬꅇNiB彝族人网（彝人网）- 彝族文化网络博物馆

NiB彝族人网（彝人网）- 彝族文化网络博物馆

ꄡꃅꄉꇬꆹ，ꃰꐻꑵꌠꏛꃅꐯꌐꇈ，ꑋꈌꂶꌠꇬꑟꇁꄡꑟꀐ；ꄡꃅꄉꇬꆹ，ꎰꆳꑋꆳꄅꄉꀒꁏꑟꄉꇈꁦꀑꌋꈤꊪꄉ，ꈯꌦꈯꇙꐴꅑꅿꊧꅑꃨꄉꑋꈌꉂꅇꏛꃅꄜꄡꑟ；ꄡꃅꄉꇬꆹ，ꈬꉙꈬꃪꊨꊭꉙꁊꐭꌸꀕꄉꑋꈌꑵꉙꎴꌠꑵꎼꆹꄡꑟ；ꄡꃅꄉꇬꆹ，ꑘꃅꃰꊿꇗꇁꈁꂷꀖꄉꆫꄓꂿꄑꋚꊪꒉꏽꑘꃅꊖꑣꃛꄡꑟ......NiB彝族人网（彝人网）- 彝族文化网络博物馆

ꄚ，ꀋꃋꎼꈎꃅꈎꉌꈎꀕꀨꇬ，ꉌꈲꈎꏅꂾ，ꆅꁮꈻꁘꀉꉌꌟꃅꊿꋋꌂꑠꂷꄚꅐꇁ--ꋍꃀꆅꆅꅋꀊꏀꑠꑵꄚꄉꃓ。ꂴꆏꃶꉴꅐ，ꊂꆏꃛꀙꅐ，ꊂꆏꍏꇩꑭꊂꀋꃹꅉꀋꐥ。ꀋꇷꋠꌠꆅꑠꂷ，ꌗꅐꌗꈻꅉꇬꄉꑌꐯꇳ，ꐺꄟꉆꋒꇬꄉꑌꐮꇳ，ꋚꋠꒉꅝꅉꇬꑌꐯꇳ，ꈩꇁꀜꅉ、ꎼꇁꈴꅉꇬꄉꑌꐯꇳ，ꄵꇁꏮꊌ、ꉃꇁꑣꇨ、ꋒꇁꄡꇨꌠꆅꑠꂷ。ꆅꊌꆅꌸꀿꇁꃀꐞꁧꌠꐥ，ꃌꇁꒆꐞꁧꌠꐥ，ꌺꇁꇖꐞꁧꌠꐥ，ꀉꂿꌺꄂꆜꌠꐥ。ꄿꏀꇂꁮꇇꑭꅐꌠꈢꋒꁧ，ꑮꆜꅪꎔꃭꇤꏂꌠꈢꋒꁧꌠꐥ。ꀉꂿꄷꇬꎮꑑꅉ，ꀉꄉꄷꇬꂀꑍꅉ。ꎭꃅꁑꊰꀕ，ꉌꈲꈎꏅꋋꂷꃰꊿꄹꁆꑓꁴꐊꈎꏅ，ꉌꎭꃅꋆꑠꂷꄚꄉꎵꑳꀕ，ꉌꃀꋍꂷꃅꋆꇱꄉꈺꄂꀕ......NiB彝族人网（彝人网）- 彝族文化网络博物馆

ꄚ，ꐰꇑꂃ、ꎭꈓꉾꌠꆹ，ꉪꊇꆹꄚꇁꄿꌠꁍꇩꑠꂷꁨ，ꇰꀋꃀꌠꇩꏤꑠꂷꐥ---ꍏꇩꇭꍣꄉꂷꐥ；ꏃꇁꂠꌋꏲꌋꉾꂷꐥ---ꑮꏹꀻꊝꎺꏹꇨꂷꐥꐛꅹ。ꏃꇁꂠꌋ、ꏲꌋꇥꀯꐂꇁꂴꏭꉆꄉꆅꄵꌠꏲꂡ，ꆀꃅꇕꈌ、ꇩꏤꑭꊂ、ꊿꋅꃺꑌꊻꂷ14ꂡꎖꊋꏓꋍꏢꃅ，ꉌꉪꋍꈚꑟ，ꉬꇮꋧꇁꏓꄉꆅꅋꀊꏀꋋꂷꄵ。NiB彝族人网（彝人网）- 彝族文化网络博物馆

ꆅꉃꆄꄻꇮꁈꑴꁈꈁꇨꀕꌠꌧꃀꍏꇂꎫ、ꅿꇂꏩꏤꈧꌠꐥꂾꏃꊰꉆꊰꈎꀐꑴꇬ，ꐂꇊꂴꆽꅑꄉ，ꇁꌊꃶꉴꑟ，ꈍꃅꆅꄵꌠꎥꃪ。ꌧꃀꌧꌺꌦꇁꆅꀋꐒ，ꏃꊰꀑꇬꄏꂿꄷꐛꅹ，ꀋꀀꀋꑌꃅꎥꃪ，ꀋꋠꀋꅝꃅꌤꃅ。ꁌꂷꄣꂷꈁꄷꉉꀋꋺ，ꑆꊋꆿꂷꑠꌋꀧꀋꋺ。ꇗꄃꀕꃅꐂꇁꌦꆅꂴꏭꉆ，ꌦꆅꐚꃅꏝꂿꉂ，ꆅꅋꐚꃅꄡꏭꉪ......NiB彝族人网（彝人网）- 彝族文化网络博物馆

ꏃꊰꀑꇬꉃꌠꃢꐎꈚꌠꆅꉚꆅꉃꑱꌜꀊꋨꈨ，ꀉꑳꑣꋍꈌꎭꄉꇈꌠꐊ，ꌐꃶꑣꋍꈌꎭꄉꇈꌠꐊ，ꀿꃀꑣꋍꈌꎭꄉꇈꌠꐊ，ꆺꑳꏂꃴꑣꇊꋍꈌꎭꄉꇈ,ꇁꌊꃶꉴꑟ……ꑷꈐꀄꊭꌠꑣꇨꎭꄉ，ꑷꈐꀉꒉꂷꈭꋏ；ꊋꃤꀄꊭꇨꌠꌌꄉꆅꅋꀉꒉꌠꏭꄵ。ꋀꊈꆹꀿꐥꃀꐥꌺꉬꑴ，ꉂꏣꂁꇉꉌꃀꈐꏮꊎ，ꑞꑌꑽꀋꐥꄷꌌꀁꇬꄜ，ꎭꌠꑠꀋꉉ，ꇿꌠꀊꄁꄜ；ꋀꊈꆹꌺꐥꇖꐥꊿꉬꑴ，ꈍꑋꃢꄆꅇꎴꏸꈐꄉꀉꑳꀕꉨꀉꂿꎹꌋꐺꄮꇬ，ꆏꑓꁴꐝꇅꀕꌠꎭꌠꐒꌠꈍꑌꄚꐊꐺꄡꑟ，ꄚꈌꃖꅍꌋꆀꀊꄕꇨꌠꆅꅋꄵꏮꃢꈜꁿꄉꃰꊿꀊꅰꇬꀋꌋ,ꊌꂿꌠꆹꆎꇰꀋꌠꐛꒌ！ꀉꑳꌺꌕꈎꄉꌠꑱꌜꀉꂿꑠꂷ，ꎭꈓꄸꄉꆅꅋꀊꏀꊌꈭꐨ，ꉘꀋꇉꃅꋧꃅꐞꁧ。ꀉꑳꌺꍈꌠꅉꀕꃅ：ꀉꄉꀉꂿꈍꄮꉈꀱꇁꄷꅲꇬꎷ，ꀉꄉꈍꃅꅇꀱꂯ?ꆎꀉꂿꆹꂿꃋꌦꌺꀋꃋꉬ，ꀉꁁꋧꃅꄉꉪꊈꁴꈜꀕꐥꌒꌠꑖꇖꐺꑴꄷꂯꄿ？ꇰꀋꌠꀉꂿꑠꂷ，ꀉꁆꀉꂿꄙꇁꃪꌠꈭꋏꂯ，ꀉꁆꑳꈓꄙꇁꃪꌠꈭꋏꂯ，ꀬꅑꃅꋌꎼꂴꐊꁧꀐꄷꂯ？ꊾꅿꉌꃀꈐꏭꆹ，ꐛꇁꈨꀋꐛ……ꀊꋩꇅꇬ，ꈎꄜꀄꊭꇨꑴꌦꌠꀉꑳꆹꀉꂿꆹꐥꍂꃅꉈꀱꇁꀋꄎꀐꌠꈍꃅꋋꇬꅉꐚꂯ？NiB彝族人网（彝人网）- 彝族文化网络博物馆

ꉙꇐꈁꉾꀕꌠꌌꄉꆍꊈꀮꇁꄑꂯꇬꑌ，ꅇꂷꈥꇤꀕ，ꆍꃅꇏꇰꀋꂿꌠꃅꇏꇬꄜꑟꌐꀋꄎ，ꁱꇐꉏꑋꊏꌠꌌꄉꆍꅿꎭꇁꅧꐪꌧꂯꇬꑌ，ꌧꌊꇬꑟꆹꀋꄎ。ꋧꃅꆍꐥꐛꅹꋬꂻ，ꏃꃅꆍꐥꐛꅹꎔꃨ，ꁍꇩꆍꐥꐛꅹꌄꆣ，ꆅꅋꆍꐥꐛꅹ，ꄵꏮꊌꐛꂯ！NiB彝族人网（彝人网）- 彝族文化网络博物馆

ꇩꏤꌤꃅꊿꈧꌠ，ꄩꍏꑷꇬꄉꀏꑢꍔ、ꋁꊤꇬꑟꌠ，ꉈꏮꃶꉴꃅꄷꇁꌠꋍꂷꇈꋍꂷꃅꍤꆗꅲꇬꊨꄅ，ꉻꑴꄉꐮꅍꎼꈴꀋꎴ，ꈝꃀꈛꈌꇬꐏꄉ，ꈜꈪꈛꌎꇬꇊꄉꄵ,ꃷꇎꃷꇤꐮꏮꄀ，ꏣꑟꊈꌐꐯꉇꄉ，ꐮꅍꀋꎼꀋꈴ，ꀉꁆꊿꁳꏣꎼꑟꈴꀋꎼ。ꃅꈊꃅꄜꀋꐥꇂꀠꇬꄉꄜ，ꄆꅇꇬꄉꉉ、ꊉꑠQQꇬꄉꉉ，ꆅꅋꀊꏀꄵꏮꌧꇐꉉꀕꌋꆀꈁꃴꉐꃴꈤ，ꑭꎭꇇꎭ,ꀋꀀꀋꑌꐙꄏꌋꆗꌠꀋꎺ。NiB彝族人网（彝人网）- 彝族文化网络博物馆

ꉹꁌꃰꊿꋍꏅꌠꑌ，ꄈꅇꃅ、ꇩꏤꅇꃅ、ꇥꀯꅇꃅꄉ，ꂱꑱꑷꈓꄉꉻꑴ，ꋌꑌꄡꇗꇩꏤꁧꃤꃅꌠ，ꐧꋦꈲꏣꐥꌠꉬꑴꄷꄉ。ꅇꃅꉐꃅꑷꈓꐥ，ꌤꐥꆿꐥꄆꅇꅥ。ꑮꑟꅪꏷꌠꀋꃅ，ꀑꆅꑭꊸꇬꑌꌌꈝꀋꐮꃅꀞꄻ。ꃆꇁꑘꀋꏲ、ꏣꇁꑟꀋꄜ、ꃥꌵꊈꀋꏢ、ꎧꀞꎸꀋꀞ。ꅡꊪꀕꃅꀀꇬꑌꄉꆅꏭꄵ，ꎵꑳꀕꃅꉂꏣꌌꄉꆅꌸꊿꊋꊡ。NiB彝族人网（彝人网）- 彝族文化网络博物馆

ꑠꂷꄉ，ꏛꃅꑟꄡꑟꌠꑋꈌꑠꂷ，ꆅꅋꀊꏀꑠꂷꇯꄉꇤꄉ，ꑭꁘꀉꇖꇨ。ꃰꐻꈻꄂꀕ，ꇭꀧꄚꄉꈻ，ꉌꃀꄚꄉꁒ；ꌦꅪꄚꄉꊰ，ꑓꁴꄚꄉꅐ，ꀋꇷꉘꄹꀕ......NiB彝族人网（彝人网）- 彝族文化网络博物馆

ꑠꂷꄉ，ꋧꃅꑠꂷꄃꄚꎍ，ꎵꄚꅑ。ꃰꊿꉬꇮꉜꀕꑓꏣꈘ，ꈍꄮꉇꏮꅐꉆꌠꇁꉚ，ꋧꃅꁤꐞꄑꌠꉂꇁ，ꑋꈌꃨꎔ、ꊨꊭ、ꈨꑭꉂꇁ。ꀄꂻꈐꏭꑋꈌꇬꑟꇁ，ꀀꐚꇁꄮꑳꀏꑳꈌꀊꄁꂿ......NiB彝族人网（彝人网）- 彝族文化网络博物馆

ꑋꈌ，ꃰꊿꆎꇁꉚꅗ，ꄡꇗꉘꇉꌠꇢꀋꏿꃅꇬꑟꇁ；ꆅꅋ，ꃰꊿꇬꄙꅗꀑꌠ，ꄡꇗꉘꇉꌠꇢꀋꏿꃅꊋꐛꂯ！NiB彝族人网（彝人网）- 彝族文化网络博物馆

ꑋꅐꑋꈌꁏ，ꈨꑭꎔꆹꂯ；ꁦꀑꂙꃨꀕ，ꂷꊂꌒꆹꂯ；ꊨꊭꉙꁊꇰ，ꀑꇬꋬꂻꂯ！NiB彝族人网（彝人网）- 彝族文化网络博物馆

这里是彝族文化网络博物馆，海量的数据，鲜明的彝族文化特色，是向世界展示彝族文化的窗口，感谢您访问彝族 人 网站。