彝族文化网络博物馆（2001年创建）
《ꐚꆫꄀꈬꉙꇐꌋꀘ》
ꐚꏪꀀꉼ ꐚꆫꏁꄜ ꁁꑟꄓ ꏓꄻ
《吉赫丁古诗歌选读》（彝文）
杰觉伊泓 罗军 潘兴德 编
高等学校统编教材教育资助项目
四川彝族文化研究中心一般规划资助项目
ꌐ ꁌ ꅇ
ꄯꒉ《ꐚꆫꄀꈬꉙꇐꌋꀘ》ꋌꋐꆹ，ꉙꇐꁱꊿꐚꆫꄀꈬꇫꐥꄮꇬꁱꄉꌠꉙꇐꏓꈹꄉꌠꉬ。ꁱꊿꉙꇐꁱꇐꀉꑌꃅꐥ，ꄚꀊꏀꏃꃅꇫꈴꁧꄉ，ꉙꇐꀉꑌꄹꁆꆘꅞꀐ，ꀋꃋꇫꋒꇈꌠꆏꏓꌊꄯꒉꋌꋐꐛ。
ꄯꒉꋌꋐꈐꏭꐊꇐꆏꁸꌕꈨꃅꄉ，ꂴꆽꈧꌠꆏꄐꀘ。ꋋꈨꇬ，ꄯꒉꋌꋐꄻꀑꄻꂪ、ꁱꊿꐥꐨꐥꄸ、ꁱꇐꐋꀋꌡꐨꃆꂮꉉꀽ。ꄯꒉꋌꋐꄻꇬꐋꀨꇇꇬꈴꄉꁱꊿꅿꉙꇐꑍꈓꎖꎹꈹ，ꀋꉬꀋꉆꑘꌠꆏ《ꆃꎭꑍꄜ》ꌋꆀ《ꆃꎭꉜꇐꁱꀕ》ꇬꄉꎹꌊꇁ。ꁱꊿꆹꇇꏸꂮꄉꀙꌬꑱꈐꒆꇁꌠꀋꉬ，ꂓꅑꂓꋦꆀꃅꇣꄧꈨꈴꂷꑌꀋꉬ，ꎃꐚꂘꃀꂷꀉꄂꉬ，ꄚꋌꆈꌠꅇꂷꁱꂷꉁꅉ，ꀊꅰꃅꆈꌠꁱꂷꑴꂷꌌꌫꄻꅉꇬꅐꌞꐥ。ꋍꏢꌠꆏ，ꀋꎪꀋꑴꃅꌶꅉꇬꆈꌠꁱꂷꂘ，ꂘꌌꄞꅐ，ꌶꌺꌧꃰꌧꇤꌟꃅꃨ;ꑍꏢꌠꆏ，ꋌꐧꌶꅉꒉꌶꅉꂘꑳꇂꃴꀋꑌꃅꊨꏦꌷꅐꇁꌠ，ꆈꌠꁱꂷꌌꁱꌠꉙꇐꁱꊿꈐꏭꊿꈐꏭꋍꂷꉬ，ꋋꍈꆹꁌꇐꈤꌠꉬꋭ，ꋌꌷꃆꌷꂮꉌꊈꌋꆀꉙꇐꈐꏭꋊꅐꇁꌠꉪꇐꑠꑌꀊꅰꁌꇐꈤꋭ。ꋌꉙꇐꁰꏦꀒꋏꆀꉙꀕꇐꁰꏦꑌꍬ，ꉈꑴꏀꄖꏀꄻꌠꑌꐊ，ꉙꇐꐊꇐꉾꃪ，ꉙꇐꇳꉻꐛꋽꉻꃰ，ꉙꇐꅇꑳꉐꑳ，ꐛꒌꋽꇴ，ꋋꈨꌌꂘꑳꇂꃴꄉꂘꅍꌬꇐꃅꇬꄉꄐꏭꐛ。
ꋍꊂꈧꌠꆏꉙꇐꌋꀘ。ꋋꈨꇬꉬꇮꉙꇐ80ꎴ，ꁱꊿꃅꐎꊰꈎꎖꇵꂷꌋꆀꉌꂵꌦꅪꌌꀠꌊꇁꌠ，ꉙꇐ80ꎴ，ꑍꎴꐯꀋꌡ，ꋍꎴꈀꐥꃅꊿꋋꀘꏾꃅꐙ。ꉙꇐꋋꈨꁱꊿꉂꐪꏝꊂꐓꂿꀕꑌꇫꐊ，ꂘꅇꑴꅇꎺꇊꐝꄧꀕꌠꑌꇫꐊ，ꋍꃅꄸꃅꌠꏭꊨꅇꀖꅇꑌꇫꐊ，ꃆꏂꊂꑋꉘꇉꐨꑌꇫꐊ，ꐥꐨꐥꄸꉈꑟꈻꌠꀮꄑꌠꑌꇫꐊ，ꆀꃅꃄꈌꃄꏦ，ꁧꎔꇈꃨ，ꒉꎔꃪꎔꐛꒌꒃꉇꌠꑌꇫꐊ，ꁮꅉꅺꊈꃆꂮꉙꇐꑌꇫꐊ，ꋋꆹꇯꍝꃅꋠꇐꊰꃘꑠꐊꌠꉙꇐꋚꑌꋚꌗꍔꉬꋭ，ꉨꏵꀕꐓꂿꀕꑠꆹꋍꍈꑌꄝꁧꈿꆿꈿꀋꏾ。
ꌕꈨꌠꆏꈬꎃꉙꇐ。ꁱꊿꉙꇐꈐꏭꉙꇐꀉꑌꈨꉙꇐꁱꇐꃆꂮꌋꆀꈬꎃꁱꇐꃆꂮꐯꌼꎍ，ꑠꅹꌌꈬꎃꉙꇐꂓ。ꈬꎃꉙꇐꉬꇮꊰꑋꎴꏓꌊꄯꒉꋌꋐꈐꏭꇱꄉ。ꈬꎃꉙꇐꋋꈨꇬꁱꌊꊼꇅꀉꎴꌠꐥ，ꀁꎴꌠꐥ，ꐊꇐꑌꐯꀋꌡꑴꇬ，ꄚꌤꆿꉜꇬꑗꇗꐥ，ꉜꐨꎃꊒ，ꐛꒌꀉꒆꅉ，ꅇꂷꅇꌺꇈꈬꁬꇁꆰꃨꌡ，ꀊꏂꀊꅪꐊ，ꃴꇁꆧꌠꐊ，ꈁꉜꈀꋽꀕ;ꅇꋊꉐꋊꇉꄩꇪꀮꂿ，ꈁꉉꅲꇢꈻ，ꈁꋊꊽꉌꐡ，ꋋꆹꉅꇊꄟꄉꏽ，ꄟꇊꀄꃹꑐꄉꏽ，ꀱꇊꉜꇈꃅꄉꏽꌠ。
ꇖꈨꌠꆏꎥꃪꁱꇐ。ꋋꊭꇬꆏꉎꏯꉙꇐꈧꌠꌌꎥꃪ，ꋍꏢꌠꆏꁱꇐꌧꇗꀂꏽꈴꄉꎥꃪ，ꉙꇐꅿꅇꒃꉐꒃꄟ，ꇳꉻꐛꏦ，ꐊꇐꌋꆀꉪꇐꏡꇐꑤꈍꑋꈨꇬꈴꄉꉉꈻ，ꅇꒃꉐꒃꄟꈴꄉꉜꇬ，ꉙꇐꅇꂷꃅꋊꀊꏀꐊꐨꐥ，ꅇꂷꏀꄖꏀꄻꉻꃅꐙ;ꉙꇐꇴꉻꐛꏦꈴꄉꉜꇬ，ꆈꌠꉙꇐꀉꆹꈧꌠꌋꆀꀊꅰꐯꀋꌡ，ꇴꋽꉺꋽꌠꀉꄂꀋꉬꃅ，ꇤꋲꐨꐥ，ꇴꏦꉺꏦꆹꐥꐨꇬꎊꈬꐛꉻꀉꑌꑵꌡ;ꉙꇐꐊꇐꀉꑌ，ꋧꃅꉜꐨꎃꊒ，ꉪꇐꏡꇐꇣꋲꐨꐥ。ꑍꏢꌠꆏꌧꊿꂿꊿꉙꇐꁱꇐꈋꍣ，ꆈꀜꃅꇫꌧꃀꆹꁱꊿꅿ《ꅋꃨꉂꏣꑵꉙ》ꎳꌠꈋꍣꋺ，ꋌꉙꇐꋌꁬꈋꍣꄟꑌꄻꄚꇱꄉ。ꉙꇐꁱꊿꊯꎖꈎꀋꆏꃅꆈꌠꉙꇐꒃꉇ，ꉙꇐꁱꊿꂓꊯꎖꂷꌬꋺ，ꋋꈨꉬꇮꏓꎥꃪꋋꊭꇬꇱꄉ。
ꄯꒉꋌꋐꅐꇬꀋꉬꀋꉆꑘꌠꆹꁱꊿꋍꍂꃅꆈꌠꉙꇐꁱꇐꀂꏽꑆꊋꐥꌠꎺꋉꈨꄀ，ꆈꌠꅇꂷꁱꂷꌌꀒꁨꋍꁘꃅꀻꎆꆹꌠꏭꈐꊟꊋꊡ。ꄯꒉꋌꋐꄻꋋꇅ，ꎆꏣꆿꂷꑌꀋꐥ，ꌧꍧꆈꌠꌧꇐꎥꃪꈯꄜꌋꆀꀒꎂꑪꑼꆀꉙꁰꀕꑫꎆꏣꆿꂷꀂꏽꀉꒉꃅꇇꀨꇇꄻ。ꁱꊿꌺꒉꐚꆫꏂꄜꀉꄉꉙꇐꍸꇐꀉꑌꈨꎹꌊꇁ，《ꆃꎭꑍꄜ》ꇬꐋꀨꌋꆀꀉꁁꐋꀨꐋꌺꈧꌠꐚꆫꄀꈬꉙꇐꍤꄻꄮꇬꇇꀨꅍꀉꒉꃅꐥ。ꑠꉬꐛꅹꄯꒉꋌꋐꅐꄎ，ꄚꇬꆏ，ꏓꇁꋍꇬꃅ，ꋀꏮꈀꎭꀕꀐ。ꄯꒉꋌꋐꄻꀑꄻꂪꇬ，ꊋꇤꏡꇤꄉꃅꀐ，ꄚꑠꉬꑴꇬ，ꄮꈉꀊꅰꀋꐥꄉ，ꌧꐨꀁꑌ，ꀋꇎꀋꂪꅉꄡꇗꀉꑌꃅꐥꋭ，ꌧꇁꂿꊿꌋꆀꉜꇁꀘꊿꏣꀋꑌꃅꄐꀨꇈꄻꐛꒆꅊꇈ。
ꐚꏪꀀꉼ
2014ꈎ4ꆪ2ꑍꀒꎂ
ꎹ ꀨ：（ꀑꐱ）
ꋍ、ꄐꀘ
ꑍ、ꌋꀘ
ꌕ、ꈬꎃꉙꇐ
ꇖ、ꎥꃪꁱꇐ
